Սուրեն Պապիկյանը կոչ է արել քաղաքացիներին զերծ մնալ բանակին աջակցող նվիրատվություններից
Մասնավոր նախաձեռնությունների հեղինակներին հորդորում եմ զերծ մնալ բանակին աջակցելու նպատակով տարբեր ակցիաներ և նվիրատվություններ իրականացնելուց։ Այս մասին սեպտեմբերի 14-ին ԱԺ-ում կառավարության ժամին, պատասխանելով ԱԺ նախագահ Ալեն Սիմոնյանի հարցին, հայտարարեց ՀՀ պաշտպանության նախարար Սուրեն Պապիկյանը։
Գերատեսչությունը, նրա խոսքով, ի վիճակի է բավարարել բանակի կարիքները։
«Եվ այս փուլում, երբ մոբիլիզացիա չի հայտարարվել, խնդրում եմ մեր համաքաղաքացիներին ինքնագործունեությամբ չզբաղվել։ Եթե կա բանակին օգնելու ցանկություն, ապա կարող եք ուղղակի կապ հաստատել իմ մամուլի քարտուղարի հետ և հնարավորության դեպքում բարոյական աջակցություն հայտնել»,- ասաց ՊՆ ղեկավարը։
Պապիկյանը վստահեցրեց, որ ՊՆ ղեկավարությունը պատրաստ է համագործակցել բոլորի հետ։ Նա շնորհակալություն հայտնեց օգնության և պատրաստակամության համար։
«Բայց տարբեր նախաձեռնություններ հաճախ վարկաբեկում են բանակը»,- ամփոփեց ՊՆ ղեկավարը։
Հիշեցնենք, որ սեպտեմբերի 13-ի կեսգիշերին Ադրբեջանի ԶՈւ ստորաբաժանումները սկսել են ինտենսիվ հրետակոծել Սոթքում, Վարդենիսում, Գորիսում, Կապանում, Արտանիշում և Իշխանասարում տեղակայված հայկական դիրքերը։ Հարվածներ են հասցվում նաև քաղաքացիական ենթակառուցվածքի օբյեկտների ուղղությամբ։ Հայկական կողմից կան զոհեր և վիրավորներ։ ՀՀ իշխանություններն արդեն դիմել են Ռուսաստանին, ՀԱՊԿ-ին և ՄԱԿ-ի Անվտանգության խորհրդին՝ հանրապետության ինքնիշխան տարածքի դեմ Ադրբեջանի ագրեսիայի կապակցությամբ։
News.am