Միշուստինը հոկտեմբերի 21-ին Երևանում կմասնակցի Եվրասիական միջկառավարական խորհրդի նիստին
Ռուսաստանի վարչապետ Միխայիլ Միշուստինը հոկտեմբերի 21-ին Երևանում կմասնակցի Եվրասիական միջկառավարական խորհրդի նիստին, իսկ հոկտեմբերի 28-ին Աստանայում՝ ԱՊՀ երկրների կառավարությունների ղեկավարների նիստին, փոխանցում է «ՌԻԱ Նովոստի»-ն։
«Մենք մշտական կապի մեջ ենք ձեզ հետ։ Տարեսկզբից մենք, կարծեմ, հանդիպում ենք հինգերորդ անգամ և մինչև հոկտեմբերի վերջ կտեսնվենք ևս երկու անգամ՝ հոկտեմբերի 21-ին Երևանում կայանալիք Եվրասիական միջկառավարական խորհրդին և նաև ԱՊՀ կառավարությունների ղեկավարների խորհրդին Աստանայում հոկտեմբերի 28-ին»,- հինգշաբթի ասել է Միշուստինը Ղազախստանի վարչապետ Ալիխան Սմայիլովի հետ հանդիպմանը։
Ռուսական կողմը, նշել է նա, մեծ նշանակություն է տալիս տրանսպորտային համագործակցությանը, այդ թվում՝ Հյուսիս-Հարավ միջազգային միջանցքի շրջանակներում։ «Նոր երթուղին անհրաժեշտ է մատակարարման շղթաների, հումքի, բաղադրիչների, պատրաստի արտադրանքի մատակարարման ապահովման, մեր երկրների և տարածաշրջանում մեր հարևանների միջև կապի ամրապնդման և, իհարկե, առևտրի հետագա աճի խթանման համար»,- ասել է Միշուստինը:
News.am