Արման ԹԱԹՈՅԱՆ․ ԲԱՔՈՒՆ ՉԻ ՁԳՏՈՒՄ ԽԱՂԱՂՈՒԹՅՈՒՆ ՍՏՈՐԱԳՐԵԼ՝ ՀԱՎԱՏԱԼՈՎ, ՈՐ ԱՌԱՆՑ ԴՐԱ ԱՎԵԼԻԻՆ ԿՀԱՍՆԻ
Ադրբեջանի ռազմական սադրանքներն ընդհանուր ռազմավարության տարր են՝ ուղղված Արցախը և ողջ Հայաստանը գրավելուն։ Այս մասին հայտարարել է ՀՀ նախկին օմբուդսմեն Արման Թաթոյանը։
Նրա խոսքով, Բաքուն չի թաքցնում իր ռազմավարական նպատակը, այդ գիծը բացահայտորեն հետապնդվում է և նկատելի է նույնիսկ Ադրբեջանի նախագահի հրապարակային հայտարարությունների մակարդակով։ Նա նշեց, որ Ադրբեջանի նախագահը տարածքային պահանջներ է առաջադրում Հայաստանին, մինչդեռ այդ պահանջների աշխարհագրությունը լայն է՝ Սյունիքից մինչև Գեղարքունիք, ներառյալ Երևանը։
«Ուստի, ամենևին էլ պատահական չէ, որ սեպտեմբերյան ագրեսիայից հետո հրապարակվեց այսպես կոչված «Գոյչե-Զանգեզուրի Հանրապետության» քարտեզը, որի գոյությունը հիմնավորվում էր կեղծված «պատմական փաստերով»։ Ակնհայտ է, որ ադրբեջանական կողմը մտադիր չէ սահմանափակվել 44-օրյա պատերազմի արդյունքներով»,- «168 ժամ»-ի եթերում ասել է Թաթոյանը։
Նա նշեց, որ Ադրբեջանը շարունակում է հայատյաց տրամադրություններ ձևավորել և ուժեղացնել թշնամու իմիջն ի դեմս Հայաստանի՝ օգտագործելով սա որպես ներքաղաքական գործիք՝ իշխանությունը պահպանելու համար։
«Ուստի նրանք չեն դադարեցնի սադրանքները։ Ավելին` նրանք կշարունակեն անպատժելիության մթնոլորտ ձևավորել իրենց զինվորականների ցինիկ և հանցավոր գործողությունների համար»,- ասաց Թաթոյանը։ Նա վստահ է, որ Ադրբեջանին իրականում պետք չէ խաղաղության պայմանագիր, Բաքուն չի ձգտում այն ստորագրել։ «Նրանց կարծիքով, առանց խաղաղության պայմանագրի, նրանք կկարողանան մեծ արդյունքների հասնել»,- ասել է նա։