Կարեն ՎՐԹԱՆԵՍՅԱՆ․ ՀԱՅԱՍՏԱՆԸ ՀԱՅԵՐԻՑ ԴԱՏԱՐԿԵԼՈՒ ՀԱՄԱՐ ԸՆԴԱՄԵՆԸ 2 ՇԱԲԱԹ Է ՊԱՀԱՆՋՎՈՒՄ
Կարեն Վրթանեսյանը ֆեյսբուքյան իր էջում գրում է․
Չեմ կարծում, թե որևէ ադրբեջանցի 150 հազար դոլար է տալու հայկական անձնագրի համար, որովհետև վստահ են, որ հայկական պետություն շուտով չի լինելու։
Ընդդիմադիր տարբեր մեկնաբաններից հաճախ եմ լսում այն սցենարը, համաձայն որի թուրքերն ու ադրբեջանցիները՝ հարգելով ՀՀ միջազգայնորեն ճանաչված սահմանները, միջազգային իրավունքը, փորձելու են ինչ-որ «կուլտուրական ձևերով» Հայաստանը գրավել, այդ գործընթացը տասնամյակներով ձգելով… Ասենք՝ «Նրանք հարյուրավոր միլիոններ կներդնեն ու կգրավեն մեր տնտեսությունը» կամ «Հազարներով կգան Հայաստանում կբնակվեն, արագ կբազմանան ու 40-50 տարի հետո ԱԺ-ում կլինեն մեծամասնություն» ևն, ևն։
Շատ ավելի իրատեսական, սրընթաց և աղետալի սցենարները չգիտեմ ինչու չեն դիտարկվում։
Մեծ հաշվով Հայաստանը հայերից դատարկելու համար ընդամենը 2 շաբաթ է պահանջվում. ոչ մի թուրք ու առավել ևս ադրբեջանցի, որևէ միջազգային իրավական նորմերով իրեն չի սահմանափակելու, երբ վստահ եղավ, որ իր գլխին բամփող չի լինելու։ Ինչպես նաև երբ վստահ լինի, որ Հայաստանը չի դիմադրելու։
Ու քանի դեռ ՀՀ-ն օկուպացված է Ալիևի ու Էրդողանի շահերի սպասարկու Նիկոլի ռեժիմով, իրենց այդ վստահությունը բացարձակապես անհիմն չէ։