Մակեյն առաջարկեց ՀԱՊԿ-ում խնդիրները քննարկելիս հրաժարվել դիվանագիտական լեզվից

Բելառուսի արտգործնախարար Վլադիմիր Մակեյը հույս ունի, որ նոյեմբերի 23-ին Երևանում կայանալիք ՀԱՊԿ գագաթաժողովը վճռական ներդրում կունենա կազմակերպության կատարելագործման գործում։ Այս մասին նա լրագրողներին ասաց երկրների ղեկավարների մակարդակով միջպետական ֆորումի նախաշեմին, հայտնում է ԲԵԼՏԱ-ն։

«Ակնկալում ենք, որ այս գագաթաժողովն արդյունավետ կլինի, և հանդիպումը պետք է վճռական ներդրում ունենա մեր կազմակերպության կատարելագործման գործում։ Պետք է իսկապես հասնել այնպիսի վիճակի, որ ՀԱՊԿ-ի հետ հաշվի նստեն մի շարք այլ ինտեգրացիոն կառույցներ, կազմակերպություններ՝ տարածաշրջանային, միջազգային։ Դրա համար մենք ինքներս պետք է ամեն ինչ անենք, որպեսզի մեր կազմակերպության ներսում տիրի կորպորատիվ համերաշխություն, որպեսզի մենք պահպանենք անվտանգությունը ՀԱՊԿ տարածքում։ Որպեսզի մենք իսկապես փորձենք լսել միմյանց, երբ խոսում ենք ինչ-որ բաների մասին: Ցավոք, եկեք անկեղծ լինենք, միմյանց նկատմամբ պահանջները բավականին շատ են։ Եվ պետք է ասել այդ մասին բաց և անկեղծ, ինչպես անում են իսկական բարեկամները։ Միայն այդպես կարելի է հասնել այն նպատակներին, որ քո առջև դնում ես»,- ասաց նախարարը։

Հաշվի առնելով, որ ՀԱՊԿ նախագահությունը Հայաստանից անցնելու է Բելառուսին՝ Վլադիմիր Մակեյին խնդրեցին մանրամասներ հայտնել առաջնահերթությունների մասին, որոնք պետք է հայտարարի երկրի ղեկավար Ալեքսանդր Լուկաշենկոն գագաթաժողովում։

Նախարարը նշեց, որ, ընդհանուր առմամբ, Բելառուսի դիրքորոշումը ՀԱՊԿ-ի հետ կապված հարցերում չի փոխվում։ «Հիմնականում ոչինչ չի փոխվում։ Մենք միշտ հանդես ենք եկել բոլոր վեճերի և հակամարտությունների խաղաղ կարգավորման օգտին։ Այն բանի համար, որ եթե դու կազմակերպություն ես ստեղծում, այն պետք է արդյունավետ գործի: Իրար օգնելու համար, այդ թվում՝ միջազգային ասպարեզում, երբ անհիմն ճնշում է գործադրվում այս կամ այն երկրի վրա, ինչը, ցավոք, մենք, անկեղծ ասած, հիմա չենք տեսնում Բելառուսի հանդեպ։ Բայց դիրքորոշումը հիմնովին չի փոխվում։ Բնականաբար, մոտեցումները փոխվում են՝ կախված այն իրավիճակից, որը ձևավորվում է մեր տարածաշրջանում, ամբողջ աշխարհում։ Մենք պետք է հաշվի առնենք։ Մենք այդ մասին խոսում ենք բաց և անկեղծ։ Բացարձակապես բաց ենք մեր կազմակերպության զարգացման հետագա ուղիների վերաբերյալ անկեղծ երկխոսության համար»,- ասաց Վլադիմիր Մակեյը:

News.am