Իշխան Սաղաթելյան․ ՀՀ իշխանությունները Հայաստան չեն
Մարսելում ՀՅԴ 132-ամյակին նվիրված միջոցառմանն ընթացքում ՀՅԴ ԳՄ անդամ, «Հայաստան» խմբակցության պատգամավոր Իշխան Սաղաթելյանը հանդես է եկել ելույթով։
Նա նշել է, թե Դաշնակցությունը ստեղծվել է հայ իրականությունը փոխելու համար և փոխել է այն։
«Պատմության մեջ մենք շատ բան ենք տեսել․ փայլուն հաղթանակներից մինչև ծանր պարտություններ, վերելքներից մինչև ցավոտ վայրէջքներ, սակայն մեզ հաջողվել է պահպանել գլխավորը՝ ազատ, անկախ և միացյալ Հայաստանի իդեալը։ Ռուբեն Տեր-Մինասյանն ասում էր, պայքարից հոգնածը մահանում է, միայն պայքարի եռանդով լցվածն է, որ ապրում և տիրում է։ Ուրեմն ամեն գնով մեր ժողովրդի և պետականության համար կենսական պայքարը շարունակելն այսօր մեր գլխավոր առաքելությունն է», - նշել է Սաղաթելյանը։
Ընդդիմադիր պատգամավորն ընդգծել է՝ դեմ չեն խաղաղությանը, բայց այդ խաղաղությունը չի կարող լինել հայրենազրկման գնով, չի կարելի խաղաղության անվան տակ ժողովրդին տանել նոր կապիտուլյացիայի և ցեղասպանության։
«Մենք ունենք մեկ դրոշ՝ դա հայոց եռագույնն է, և ողջ հայ ժողովուրդը՝ անկախ իր քաղաքական հայացքներից, կուսակցական պատկանելությունից պետք է համախմբվի հայոց եռագույնի շուրջ։
Հայ ժողովուրդը, Հայաստանը և ՀՀ իշխանությունները նույնը չեն, ՀՀ իշխանությունները Հայաստան չեն, հետևաբար Հայաստանից պետք չէ հիասթափվել, հայրենիքը բոլորի կարիքն ունի», - հայտարարել է Իշխան Սաղաթելյանը։
News.am
