Քրիստինե Գրիգորյան․ Ադրբեջանցի «բնապահպանների» ակցիան շինծու է, կան փաստեր

Ադրբեջանցի «բնապահպանների» ակցիան շինծու է, կան փաստեր, որ դա կազմակերպվել և իրականացվում է Ադրբեջանի իշխանությունների կողմից։ Այս մասին լրագրողների հետ հրավիրված ասուլիսում հայտարարեց ՀՀ ՄԻՊ Քրիստինե Գրիգորյանը։

Նշենք, որ ՀՀ մարդու իրավունքների պաշտպանը և Արցախի մարդու իրավունքների պաշտպանը համատեղ «Արցախը Հայաստանի ու աշխարհի հետ կապող միակ ճանապարհի փակման հումանիտար հետևանքների մասին» զեկույց են ներկայացրել։

«Զեկույցի պատրաստումը եղել է օպերատիվ և փաստերի արագ ներկայացումը միջազգային հանրությանը կարևոր էֆեկտ է ունեցել և կունենա։ Զեկույցում տեղ են գտել դեկտեմբերի 12–ից 15–ը տեղի ունեցած իրադարձությունները։ Մենք նույն օրը կոմունիկացրել ենք միջազգային կազմակերպություններին, դիվանագիտական ներկայացուցչություններին, որը պետության նկատմամբ միջազգային ճնշումն ավելացնելու հավելյալ ներդրում է ունեցել, և ժամ առաջ դա անելը շատ կարևոր էր»,–ասաց Գրիգորյանը։

Փաստեր են ներկայացվել նաև անձանց իրավունքների շարունակական խախտումների վերաբերյալ։

Գրիգորյանի խոսքով` իրենք շարունակում են փաստահավաք աշխատանքներ իրականացնել։

Sputnik Արմենիա