Ադրբեջանցի լրագրողները ներթափանցել են Մատաղիսի Եղիշե Առաքյալի վանք

Ադրբեջանցի լրագրողները երեկ՝ դեկտեմբերի 16-ին, ներթափանցել են Մարտակերտի շրջանի Մատաղիս գյուղի մոտակայքում գտնվող Եղիշե Առաքյալի վանք: Այս մասին NEWS.am-ի հետ զրույցում ասաց Արցախի Հանրապետության ԿԳՄՍ փոխնախարար Լեռնիկ Հովհաննիսյանը:

«Եկեղեցին չեզոք գոտում է: Մենք դեռևս չգիտենք, թե ինչպես են իրենք կարողացել մտնել եկեղեցի և ինչ են արել այնտեղ: Եկեղեցին Մատաղիսից 5-6 կմ հեռավորության վրա է, և այն ավելի մոտ է ադրբեջանական դիրքերին, քան մեր, դրա համար գուցե իրենք կարողացել են հեշտությամբ ներթափանցել: Մենք չգիտենք՝ այդ հատվածում խաղաղապահներ կան, թե՝ ոչ: 2021 թվականին տեսանյութ էր տարածվել համացանցում, որտեղ երևում էր, որ զինված ադրբեջանցիները մտնում են Մատաղիսի Սուրբ Գևորգ եկեղեցի և պղծում այն: Այն սխալմամբ ներկայացվեց որպես Եղիշե Առաքյալի վանք, բայց այն հստակ Մատաղիսի գյուղամիջյան եկեղեցին էր, անգամ գյուղի ջրամբարն էր երևում»,- նշեց նա:

Լեռնիկ Հովհաննիսյանի խոսքով՝ սա Եղիշե Առաքյալի վանք մուտք գործելու մասին առաջին ահազանգն էր, որն իրենց հայտնի է: Պատերազմի ավարտից հետո հայկական կողմը չի մտել վանք՝ հաշվի առնելով վտանգը: