Պետք է շտապ վերականգնվի Լաչինի միջանցքով ազատ տեղաշարժը. ԵԽԽՎ դիտորդների հայտարարությունը

Լաչինի միջանցքով մարդկանց և ապրանքների տեղաշարժի ազատությունն ու անվտանգությունը պետք է շտապ վերականգնվի։ Այս մասին ասված է Եվրոպայի խորհրդի խորհրդարանական վեհաժողովի (ԵԽԽՎ)` Ադրբեջանի և Հայաստանի մոնիտորինգի գծով չորս համազեկուցողների հայտարարության մեջ, որը հրապարակվել է ԵԽԽՎ–ի կայքում։

Նրանք նաև մտահոգություն են հայտնել Լաչինի միջանցքում տեղաշարժի ազատության խախտմամբ, ինչը զգալի դժվարություններ է ստեղծում բնակչության համար։

«Կոչ ենք անում 2020 թվականի նոյեմբերի 9–ի եռակողմ հայտարարության բոլոր կողմերին անհապաղ ձեռնարկել անհրաժեշտ միջոցներ»,– նշվում է Յան Լիդել-Գրեյնջերի (Միացյալ Թագավորություն), Լիզ Քրիստոֆերսենի (Նորվեգիա), Կիմմո Կիլյունենի (Ֆինլանդիա, SOC) և Բորիանա Աբերգի (Շվեդիա) ստորագրած հայտարարությունում:

Նշվում է, որ ստեղծված իրավիճակը և դիվանագիտական ջանքերը դեկտեմբերի 14-ին քննարկվել են ԵԽԽՎ մոնիտորինգի հանձնաժողովի կողմից Հարավային Կովկասում ԵՄ հատուկ ներկայացուցիչ Տոյվո Կլաարի և ԵԱՀԿ ֆրանսիացի համանախագահ Բրիս Ռոկֆոյի հետ:

«Մենք վերահաստատում ենք, որ պատրաստ ենք ցուցաբերել անհրաժեշտ քաղաքական աջակցություն, այդ թվում՝ տարածաշրջանում փաստահավաք առաքելություն իրականացնելու միջոցով»,- եզրափակել են զեկուցողները:

Sputnik Արմենիա