Բժիշկների համաշխարհային ասոցիացիան Բաքվին կոչ է անում ապահովել անվտանգ անցումը Լաչինի միջանցքով

Բժիշկների համաշխարհային ասոցիացիան հումանիտար ճգնաժամում հայտնված հազարավոր քաղաքացիական անձանց օգնելու հրատապ գործողությունների կոչ է անում:

Տարածած հաղորդագրությունում կազմակերպությունը նշում է՝ ճգնաժամը հետևանք է Արցախը Հայաստանին կապող Լաչինի միջանցքի արգելափակման, որը հանգեցրել է ավելի քան 120 հազար մարդու՝ բժշկական օգնությունից կտրվելուն: «Հազարավոր մարդիկ Լեռնային Ղարաբաղի Հանրապետությունում չեն կարողանում ստանալ պարենի մատակարարումներ ու բուժօգնություն, հիվանդները տարածաշրջանում չեն կարողանում տեղափոխվել հիվանդանոց Հայաստանի մայրաքաղաք Երևանում», - ասված է հաղորդագրությունում:

Ասոցիացիայի խորհրդի նախագահ Ֆրանկ Ուլրիխ Մոնտգոմերին հայտարարել է. - «Հիվանդները մահվան վտանգի տակ են, քանի որ չեն կարողանում ստանալ իրենց դեղորայքը և հասնել հիվանդանոց: Մենք հորդորում ենք Ադրբեջանի կառավարությանը անհապաղ ապահովել անվտանգ անցումը Լաչինի միջանցքով՝ խուսափելու համար այդ վատթարացող հումանիտար ճգնաժամից: Դա կարևորագույն ճանապարհ է կենսական նշանակություն ունեցող պարենի և բժշկական մատակարարումների համար»:

Azatutyun.am