Ավետիք ՉԱԼԱԲՅԱՆ․ ՀԱՅԱՍՏԱՆՈՒՄ ԿԱՆ ԸՆԿԵՐՈՒԹՅՈՒՆՆԵՐ, ՈՐՈՆՔ ՍԿՍԵԼ ԵՆ ԱՆՕԴԱՉՈՒՆԵՐ ԱՐՏԱԴՐԵԼ ԵՎ ՄԱՏԱԿԱՐԱՐԵԼ ԲԱՆԱԿԻՆ
Հայաստանում կան ընկերություններ, որոնք սկսել են անօդաչու թռչող սարքեր արտադրել և բանակին մատակարարել։ Սա լուծում է ոչ միայն կարճաժամկետ, այլև երկարաժամկետ խնդիրներ։ Այս մասին հունվարի 27-ին կայացած քննարկման ժամանակ ասաց հասարակական-քաղաքական գործիչ Ավետիք Չալաբյանը։
Մշտական ճգնաժամային իրավիճակում չգտնվելու համար, ինչը կատարվում է ներկայիս իշխանությունների օրոք, նա կոչ արեց մտածել երկարաժամկետ հեռանկարով խնդիրների լուծման մասին:
«Ինչու Հայաստանը չի կարող կենտրոնանալ բարձր տեխնոլոգիական զենքի արտադրության վրա: Չէ որ Իսրայելին հաջողվեց», – նշեց նա:
Քաղաքական գործիչը կարծում է, որ պետք է հստակեցնել, թե որ երկրներն են Երևանի դաշնակիցները, և ինչպիսի դաշնակից է Հայաստանը հենց այդ երկրների համար։
Նա մատնանշեց անվտանգության համակարգի արագ վերականգնման և դիրքային պաշտպանության ռազմավարության վերանայման անհրաժեշտությունը, որն այլևս չի կարող ապահովել երկրի պաշտպանությունը։
«Անցյալ տարվա սեպտեմբերյան ագրեսիայի ժամանակ Ադրբեջանը կարողացավ համեմատաբար հեշտությամբ վերացնել ստատիկ դիրքերը, իսկ շարժական խմբերի հետ առճակատման ժամանակ ադրբեջանական զինուժը չկարողացավ հաջողության հասնել, քանի որ նախնական տեղեկություն չկար նրանց գտնվելու վայրի մասին և այլն։ Սա խոսում է այն մասին, որ մեզ անհրաժեշտ է ավելի շարժունակ բանակ՝ լավ տեղեկացված, լավ կառավարվող, լավ հետախուզությամբ և բարձր ճշգրտության զենքերով զինված։
Այս նպատակով ամբողջ բանակի բարեփոխման համար տարիներ կպահանջվեն, իսկ առանձին ստորաբաժանումների համար՝ վեց ամիս կամ մեկ տարի: Սա թույլ կտա վերացնել տեղական սպառնալիքը։ Եթե մենք չենք ուզում անընդհատ դրսից օգնություն խնդրել, ապա պետք է ձեռնարկենք հենց այս միջոցները»,- ասաց Չալաբյանը։