Գառնիկ ԴԱՎԹՅԱՆ․ ԲԱՔՈՒՆ ՓՈՐՁՈՒՄ Է ԻՐԱՆԻՑ ԶԻՋՈՒՄՆԵՐ ՍՏԱՆԱԼ ՀԱՅԱՍՏԱՆԻ ՀԱՐՑՈՒՄ
Բաքուն, զգալով Իսրայելի, Մեծ Բրիտանիայի և ԱՄՆ-ի աջակցությունը, փորձում է զիջումների հասնել Իրանից՝ Հայաստանով անցնող միջանցքի հարցում։ Այս մասին News.am-ի թղթակցի հետ զրույցում ասաց Ադրբեջանի հարցերով փորձագետ Գառնիկ Դավթյանը։
Նա հիշեցրեց Արցախի օկուպացված տարածքներում իսրայելական ներկայության մասին, Ադրբեջանի և Իսրայելի միջև հարաբերությունների խորացման մասին։
Փորձագետը նշեց, որ ամեն անգամ, երբ Իրանում իրավիճակը սրվում է, Ադրբեջանն ակտիվացնում է հակաիրանական քարոզչությունը։ Այդպես է եղել նաև ցույցերի ժամանակ, երբ Բաքուն փաստացի դրդում էր մարդկանց դուրս գալ Իրանի իշխանությունների դեմ։ Ակնհայտ է նման գործողություններին Ադրբեջանի իշխանությունների պետական մակարդակով աջակցությունը։
«Կարծիք կա, որ Իրանին հարվածները հասցվել են Ադրբեջանի տարածքից։ Թեհրանի համար ձեռնտու չէ հակամարտություն սանձազերծել հարևանների հետ, քանի որ դա բարդ աշխարհաքաղաքական իրավիճակ կարող է ստեղծել։ Վաղաժամ է խոսել լայնածավալ պատերազմի սկսվելու մեծ հավանականության մասին»,- հավելեց Դավթյանը։