«Փարատեք հրդեհի վերաբերյալ կասկածները». փաստաբանն արձագանքել է ՔԿ-ի հայտարարությանը
Գեղարքունիքի զորամասի կացարանում բռնկված հրդեհի զոհ դարձած զինծառայողների ծնողների ներկայացուցիչ Նորայր Նորիկյանը արձագանքել է ՀՀ քննչական կոմիտեի տարածած հայտարարությանը և կառույցին կոչ է արել իր աշխատանքով փարատել հանրության կասկածները:
Քննչական կոմիտեն այսօր հայտնել էր, որ Գեղարքունիքի զորամասի կացարանում բռնկված հրդեհից տուժած կապիտան Եղիշե Հակոբյանը հաստատել է միջադեպի վերաբերյալ քննության վարկածը։ Նախաքննական մարմին նշել էր, որ Ազատ գյուղում տեղակայված զորամասի կացարանում տեղի ունեցած հրդեհից մահացած զինծառայողների ծնողների փաստաբանի հայտարարությունները որևէ աղերս չունեն նախաձեռնված քրեական վարույթի շրջանակում ձեռք բերված փաստական տվյալների հետ։
«Ինձ դասեր տալու, սենտիմենտալ զեղումներով ու սիրողական մակարդակով հայտարարություններ անելու փոխարեն ձեր աշխատանքով փարատեք հանրության կասկածանքները, քննության առարկա դարձրեք հնարավոր բոլոր վարկածները, այդ թվում՝ ձեր բնորոշմամբ, հանրության շրջանում տարածվող անհիմն, որոշ դեպքերում աբսուրդային ենթադրություններն ու ասեկոսեները։ Եթե ձեր պնդմամբ` տուժող կողմի հայտարարությունները որևէ աղերս չունեն նախաձեռնված քրեական վարույթի շրջանակներում ձեռք բերված փաստական տվյալների հետ, այլ ուղղված են իրականացվող քննության նկատմամբ տուժողների վստահությունը խաթարելուն, ապա պաշտոնապես հայտարարում եմ, որ մեր բոլոր հայտարարությունների հիմքում առկա են փաստական տվյալներ, միաժամանակ բխում են գործի վերաբերյալ տուժողների դիրքորոշումից և համաձայնեցված են նրանց հետ, հետևաբար չեն կարող հետապնդել զոհված զինծառայողների հարազատների վիշտը, հուզական վիճակը շահագործելու նպատակ»,– հայտարարել է Նորիկյանը։
Նա նշել է, որ իր հրապարակային պնդումների հիմքում դրված են իրավասու պաշտոնատար անձանց կողմից դեպքի վերաբերյալ հայտնած տեղեկությունները, ինչպես նաև դեպքի վայրում գտնվելու ընթացքում իրականացված ուսումնասիրությունները, որոնք այս փուլում բավարար են նման պնդումներ կատարելու համար։
«Ինչ վերաբերում է տուժողների կողմից առաջ քաշված վարկածին կամ հնարավոր այլ վարկածներին, ապա վարույթն իրականացնող մարմինը ոչ թե պետք է քամահրական վերաբերմունք դրսևորի նման վարքագծի նկատմամբ և փորձ անի հանրությանը «Պարտադրել» հավատալու ՀՀ կառավարության նիստում հրապարակված պաշտոնական վարկածին, այլ պարտավոր է քննության առարկա դարձնել հնարավոր բոլոր վարկածները»,– նշել է փաստաբանը։
Նա ևս մեկ անգամ պնդել է, որ տուժող կողմը չի հավատում պաշտոնական վարկածին և պահանջում է իրականացնել անկողմնակալ ու օբյեկտիվ քննություն՝ գործի բոլոր հանգամանքները պարզելու համար։
Sputnik Արմենիա