Արթուր ՎԱՆԵՑՅԱՆ․ ԵՍ ԹՈՒՅԼ ՉԵՄ ՏԱ ՀԱՅԱՍՏԱՆԻՆ ԵՎ ԼԵՌՆԱՅԻՆ ՂԱՐԱԲԱՂԻՆ ՍՊԱՌՆԱՑՈՂ ՓԱՍՏԱԹՈՒՂԹ ՍՏՈՐԱԳՐԵԼ (ՏԵՍԱՆՅՈՒԹ)
Ես, իմ գործընկերները և հայ ժողովրդի ճնշող մեծամասնությունը թույլ չենք տա ստորագրել մի փաստաթուղթ, որը կվտանգի Հայաստանի և Լեռնային Ղարաբաղի ապագան։ Այս մասին Ղարաբաղյան շարժման 35-ամյակին նվիրված համաժողովին հայտարարեց «Հայրենիք» կուսակցության նախագահ, Հայաստանի ԱԱԾ նախկին ղեկավար Արթուր Վանեցյանը։
Նրա խոսքով, ղարաբաղյան խնդիրը Հայաստանում փորձում են հետին պլան մղել, սակայն հայերի ճնշող մեծամասնությունը չի մոռացել և մեծ նշանակություն է տալիս դրան։
«Երկար տարիներ աշխատելով ազգային անվտանգության մարմիններում՝ ես միշտ ասել եմ, որ ինձ համար առաջնահերթ է Հայաստանի և Լեռնային Ղարաբաղի անվտանգությունը, Ղարաբաղի, որը ավելի քան երկու ամիս շրջափակման մեջ է»,- հավելեց նա։
Վանեցյանը վստահություն հայտնեց, որ Լեռնային Ղարաբաղը բախվել է այնպիսի վտանգի, որը երբեք չի եղել․ ոչ Ղարաբաղյան շարժման սկզբում, ոչ էլ վերջին 30 տարիների ընթացքում նման իրավիճակ չի եղել։
Նա նշեց, որ այսօր վտանգի տակ է ոչ միայն Լեռնային Ղարաբաղը, այլև Հայաստանը։ «1991 թվականի ձմռանը Լեռնային Ղարաբաղը նույնպես շրջափակման մեջ էր, և թվում էր, թե ամեն ինչ կորած է, բայց հայերը ընդհանուր ջանքերով հասան հաղթանակի։
Դա տեղի ունեցավ ինքնավստահության պատճառով։ Այսօր այդ վստահությունը պակասում է, վստահություն չկա նաև նրանց հանդեպ, ովքեր որոշում են կայացնում։ Այսօր վիճակն ավելի վատ է, քան 90-ականներին, քանի որ չկա միասնականություն»,- ընդգծեց ԱԱԾ նախկին տնօրենը։
Նա հիմնական մեղավոր անվանեց Հայաստանի իշխանություններին՝ հիշեցնելով, որ նման իրավիճակի է հանգեցրել Նիկոլ Փաշինյանի հետևողական քաղաքականությունը։ «Այսպես կոչված խաղաղության գինը վճարելու են ոչ թե իշխանությունները, այլ ողջ հայ ժողովուրդը։ Ուստի անթույլատրելի է ժողովրդի մեջքի հետևում որևէ փաստաթուղթ ստորագրել»,- եզրափակեց Արթուր Վանեցյանը։