Ռուբեն ՎԱՐԴԱՆՅԱՆԸ՝ ՊԵՏՆԱԽԱՐԱՐԻ ՊԱՇՏՈՆՈՒՄ ԻՐ ԳՈՐԾՈՒՆԵՈՒԹՅԱՆ ՄԱՍԻՆ (ՏԵՍԱՆՅՈՒԹ)
Մենք արել ենք ամենակարևորը՝ գույքագրել ենք այն, ինչ կա Արցախում։ Այս մասին Արցախի Հանրային հեռուստաընկերությանը տված հարցազրույցում ասել է հանրապետության նախկին պետնախարար Ռուբեն Վարդանյանը։
Նրա խոսքով՝ ներդրումներ ներգրավելու, արտաքին աշխարհի հետ աշխատելու համար պետք է հասկանալ, թե ինչպիսին է իրավիճակն Արցախում։
«Ներդրումներ ներգրավելու, արտաքին աշխարհի հետ աշխատելու համար դու ինքդ պետք է նախ հասկանաս, թե ինչ ունես այստեղ, ինչ իրավիճակ է այստեղ։ Երկրորդ, մենք հստակ պարզել ենք, թե ինչպես են կայացվում որոշումները, ինչպես է աշխատում Արցախում երկրի կառավարման մեխանիզմը։ Երրորդ, մենք իսկապես տեսանք մեր նեղ տեղերը, և որտեղ մենք ունենք ամենաշատ խնդիրները, որտեղ մենք ունենք ամենաշատ մարտահրավերները: Հեշտ բան չէ ախտորոշել և հասկանալ ցավի կետերը։ Դա ժամանակ է պահանջում»,-նշել է Վարդանյանը։
Նա ընդգծել է, որ Արցախի պետնախարարի պաշտոնում գտնվելու առաջին 100 օրվա ընթացքում նախատեսվում էր ներկայացնել հետագա քայլերի տեսլականը, և այժմ այն կա։ Այժմ, ըստ նախկին պետնախարարի, կա ըմբռնում, թե ինչ է պետք անել Արցախում և՛ կրթության, և՛ ենթակառուցվածքների, և՛ ֆինանսների ոլորտներում։
Միևնույն ժամանակ, նա նշել է, որ շրջափակումը և տեղաշարժվելու հնարավորության սահմանափակումը կասեցրել են շատ բաներ, բայց շատ նախագծեր ընթացքի մեջ են, և դրանք իրականացվում են:
«Եթե մենք ուզում ենք համակարգ կառուցել, այլ ոչ թե պարզապես փիառ իրականացնել, ապա դա շատ համակարգված մոտեցում է պահանջում»,-պարզաբանեց Ռուբեն Վարդանյանը:
Նրա խոսքով՝ շատ մշակումներ կան, բայց հարցն այն է, թե կօգտվի արդյոք նախագահը, իսկ այն, թե ինչպես է նա աշխատելու հաջորդ պետնախարարի հետ, կլինի նրա որոշումը։
Ռուբեն Վարդանյանը պետնախարարի պաշտոնում իր փորձը գնահատել է որպես եզակի և ֆանտաստիկ:
Նրա խոսքով՝ կառավարության առաջին նիստում ինքը նախանշել է հինգ ճգնաժամ՝ ֆինանսական ճգնաժամ, սահմանադրական բարեփոխումների ճգնաժամ, պետության կառավարման ճգնաժամ, հնարավոր շրջափակման կամ ծանր ձմռան ճգնաժամ և ապատիայի ու անտարբերության ճգնաժամ:
«Ես պետք է ասեմ, որ այս բոլոր հինգ ճգնաժամները ես համարել և համարում եմ սկզբունքորեն կարևոր և դրանց մասին խոսել եմ և դրանց դեմ պայքարել։ Ինչ-որ տեղ մեզ հաջողվեց ինչ-որ բան փոխել, ինչ-որ տեղ՝ ոչ, բայց գլխավորն այն է, որ մենք իսկապես մտանք այս ձմեռ ոչ այնքան պատրաստ։ Ես իսկապես խոնարհվում եմ և մեծ հարգանք եմ տածում այն մարդկանց հանդեպ, ովքեր դիմացել են մեզ հետ պատահած այս ամենին»,-ընդգծել է նա։
News.am