ԿԳՄՍՆ․ Բրյուսովի անվան համալսարանի միավորման հարց այս պահին չի քննարկվում

Վալերի Բրյուսովի անվան պետական համալսարանի միավորման հարց այս պահին չի քննարկվում: Այս մասին հայտնում է ՀՀ ԿԳՄՍ նախարարության մամուլի ծառայությունը։

«Հաշվի առնելով միտումնավոր տարածվող ապատեղեկատվությունը և խնդրի հետ կապված հնարավոր թյուրընկալումները՝ հարկ ենք համարում ընդգծել, որ ռեկտորի ժամանակավոր պաշտոնակատարի նշանակումը որևէ առնչություն չունի բուհերի խոշորացման գործընթացի հետ»,– ասված է հաղորդագրությունում։

ՀՀ ԿԳՄՍՆ–ն տեղեկացնում է նաև, որ իրականությանը չի համապատասխանում պնդումը, թե առկա է բուհի լուծարման վտանգ, քանի որ դա նաև արգելված է օրենքով:

Հաղորդագրությունում ասվում է նաև, որ բանասիրական գիտությունների թեկնածու, լեզվաբան Դավիթ Գյուրջինյանը նշանակվել է ռեկտորի ժամանակավոր պաշտոնակատար մինչև «Վ. Բրյուսովի անվան պետական համալսարան» հիմնադրամի կանոնադրությամբ սահմանված կարգով ռեկտորի ընտրությունն ու հիմնադրի կողմից ռեկտորի ընտրության արդյունքների հաստատումը։

Նշենք, որ մարտի 14-ին արդարադատության նախարար Գրիգոր Մինասյանի հրամանով հաստատվեց բուհի ժամանակավոր խորհրդի կազմը։ Խորհուրդը 3 անդամ ունի՝ ԿԳՄՍ նախարար Ժաննա Անդրեասյանը, արդարադատության նախարարի տեղակալ Արմենուհի Հարությունյանն ու վարչապետի աշխատակազմի ղեկավարի տեղակալ Զարուհի Մաթևոսյանը։

Նախարարությունից նշում են, որ ժամանակավոր խորհուրդն իրականացնելու է հիմնադրամի գործունեությունը շարունակելուն ուղղված` օրենքով հոգաբարձուների խորհրդին վերապահված բոլոր լիազորությունները:

Sputnik Արմենիա