Կոնստանտին ԶԱՏՈՒԼԻՆ․ ՌՈՒԲԵՆ ՎԱՐԴԱՆՅԱՆԸ ՀԵՌԱՑԱՎ ԱՐՑԱԽԻ ՊԵՏՆԱԽԱՐԱՐԻ ՊԱՇՏՈՆԻՑ. ԱԴՐԲԵՋԱՆԸ ՉԲԱՑԵՑ ԼԱՉԻՆԻ ՄԻՋԱՆՑՔԸ
Ռուսաստանը ուժ չի կիրառում Լաչինի միջանցքը ապաշրջափակելու համար, քանի որ նման հրաման տալը հեշտ է, իսկ հետևանքները տխուր կլինեն։ Այս մասին News.am-ին տված հարցազրույցում ասել է ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը։
Պատասխանելով Լաչինի միջանցքի ապաշրջափակման վերաբերյալ Ադրբեջանին ուղղված միջազգային կոչերի անարդյունավետության մասին հարցին՝ ռուս քաղաքական գործիչը նշել է, որ մեղադրել կարելի է շատերին. «Արդյունքն այն է, որ արդյունք չկա։ Եթե մենք խոսում ենք նպատակի՝ միջանցքի ապաշրջափակման մասին, ապա միջանցքը մնում է ապաշրջափակված։ Լաչինի միջանցքի թեման քննարկվում է Ռուսաստանի մասնակցությամբ Ադրբեջանի և Հայաստանի ներկայացուցիչների հետ ցանկացած ձևաչափով հանդիպումներին։
Նախօրեին Հայաստանի արտգործնախարար Միրզոյանը Մոսկվայում էր։ Թեման նորից քննարկվեց։ Հասկանալի է, որ հայկական կողմին չի բավարարում Լաչինի միջանցքի արգելափակված մնալը։ Ռուսաստանը պահանջում է ճանաչել Լաչինի միջանցքում վերահսկելու խաղաղապահների իրավունքը և Ռուսաստանի, Ադրբեջանի և Հայաստանի միջև եռակողմ համաձայնագիրը՝ ըստ էության տարածաշրջանում հիմնականում խաղաղապահների լիազորությունների վերաբերյալ։ Ինչ վերաբերում է Ադրբեջանին, ապա նա ձգձում է և ձգտում է Լաչինի միջանցքում անցակետ ստեղծելու իրավունք ունենալ»։
Զատուլինը հիշեցրել է, որ այսպես կոչված բնապահպանների կողմից Լաչինի միջանցքի արգելափակումից հետո Ադրբեջանը տարբեր պահանջներ է առաջ քաշում։ «Ամեն ինչ սկսվեց հանքավայրերում աշխատանքի հետ կապված «անհանգստությունից», հետո խոսվեց բոլոր բեռների ստուգման անհրաժեշտության մասին, հետո պահանջ եղավ անհապաղ հեռացնել Լեռնային Ղարաբաղից Ռուբեն Վարդանյանին, ով իբր Ռուսաստանից ուղարկված ներկայացուցիչ է։
Եվ իբր դա պայման է Լաչինի միջանցքի բացման համար։ Ինչպես գիտեք, Վարդանյանը հրաժարական է տվել Արցախի Հանրապետության պետական նախարարի պաշտոնից, իսկ միջանցքը դեռ չի ապաշրջափակվել։ Եվ ես, ինչպես շատերը, շատ հստակ տպավորություն ունեմ, որ ադրբեջանական կողմը կշարունակի իր ոգով և մտադիր չէ հեռանալ Լաչինի միջանցքից»,- շեշտեց Կոնստանտին Զատուլինը։
«Ինչ վերաբերում է եվրոպական, արևմտաեվրոպական կամ ռուսական ջանքերին, դրանք այսօր արդյունքի չեն բերում։ Հռչակագրերի, խոսքերի մակարդակով ամեն ինչ ասված է, և սա այն դեպքն է, երբ և արևմտյան ներկայացուցիչները, և մենք, տարբեր տեսակետներ ունենալով հսկայական թվով խնդիրների շուրջ, այստեղ, նույն ոգով ենք արտահայտվում։ Առայժմ, չնայած փոքր-ինչ նման հայտարարություններին՝ ռուսական և արևմտյան, Լաչինի միջանցքը մնում է արգելափակված։
Ռուսաստանը ուժ չի կիրառում Լաչինի միջանցքը ապաշրջափակելու համար, քանի որ նման հրաման տալը հեշտ է, իսկ հետևանքները տխուր կլինեն։ Դրանով է բացատրվում Ռուսաստանի զգուշավորությունը, որը ցանկանում է վերադառնալ եռակողմ հայտարարությանը և հաստատել ռուս խաղաղապահների լիազորությունները՝ վերահսկելու իրավիճակը։ Հասկանալի է, որ Ադրբեջանն այլ բանի է ձգտում՝ ուզում է իր վրա վերցնել այդ վերահսկողությունը։
Այդպիսով նա ցանկանում է էլ ավելի առաջ գնալ իր նպատակների ու ցանկությունների իրականացման գործում։ Նրա մտադրությունները լիովին ակնհայտ են են։ Տարբեր պատրվակներ են հորինվում, բայց ի վերջո, վստահ եմ, Ադրբեջանի նպատակն է ինչ-որ կերպ հասնել Լեռնային Ղարաբաղից հայերի դուրս գալուն, այսինքն՝ ապահովել, որ Լեռնային Ղարաբաղը, որպես չճանաչված պետական կազմավորում, դադարի գոյություն ունենալ և հայ բնակչությունը, որը նման պայմաններում գոյության երաշխիք չի տեսնի, լքի տարածքը։ Ահա, ըստ էության, այն, ինչին ձգտում է Ադրբեջանը, նրա մտադրություններն ինձ համար ակնհայտ են»,- եզրափակել է Կոնստանտին Զատուլինը։
2022 թվականի դեկտեմբերի 12-ից Ադրբեջանը բնապահպանական ակցիայի անվան տակ արգելափակել է Լաչինի միջանցքով երթևեկությունը։ Երթևեկությունը թույլատրվում է բացառապես ՌԽԿ-ին և ԿԽՄԿ-ին: Այսօր լրանում է Արցախի շրջափակման 100-րդ օրը։
Մարիամ Լեվինա, News.am