Բաքվում կրկին ԶԼՄ-ների միջոցով Արցախի ներկայացուցիչներին հրավիրել են «հանդիպման»
Ադրբեջանի նախագահի աշխատակազմը ևս մեկ անգամ Արցախի ներկայացուցիչներին հրավիրել է «հանդիպման»։ АПА-ի հաղորդմամբ՝ այս մասին տեղեկությունը տարածել է Ադրբեջանի նախագահի աշխատակազմը:
«Ադրբեջանի Հանրապետության նախագահի աշխատակազմը՝ ի շարունակություն մարտի 1-ին Խոջալու քաղաքում կայացած հանդիպման և մարտի 13-ի հրավերի, Ղարաբաղի հայ հասարակության ներկայացուցիչներին ևս մեկ անգամ առաջարկում է ապրիլի առաջին շաբաթվա ընթացքում հանդիպում անցկացնել Բաքու քաղաքում՝ քննարկելու վերաինտեգրման հարցերը, ինչպես նաև Ղարաբաղում ենթակառուցվածքային նախագծերի իրականացումը»,-մեջբերում է լրատվամիջոցը:
Հիշեցնենք, որ Ստեփանակերտում հրաժարվել են քննարկել հանդիպման բովանդակության նման ձևակերպումը՝ հայտարարելով, որ «վերաինտեգրման» մասին խոսք լինել չի կարող: Լեռնային Ղարաբաղում նաև հիշեցրել են, որ դիվանագիտական էթիկետը չի ենթադրում ԶԼՄ-ների միջոցով հրավերների փոխանցում, իսկ բանակցությունները հնարավոր են բացառապես հավասար պայմաններով, միջազգային մեխանիզմների շրջանակներում:
News.am