Փորձագետ․ Ադրբեջանը կարող է ցանկացած պահի հարձակվել

Ադրբեջանը կարող է ցանկացած պահի հարձակվել, ինչի մասին վկայում են ե՛ւ ռազմական տեխնիկայի տեղաշարժի մասին տեղեկատվությունը, ե՛ւ ադրբեջանցի պաշտոնյաների հայտարարությունները, ինչպես նաև միջազգային կառույցների զեկույցները։ Այս մասին մարտի 30-ին լրագրողների հետ հանդիպմանն ասաց քաղաքական վերլուծաբան Արգիշտի Կիվիրյանը։

Նա պարզաբանեց, որ Բաքուն ուժեղացնում է ճնշումը, որպեսզի Երևանը կամովին գնա հերթական զիջման, որպեսզի հայերը ստորագրեն Ադրբեջանի համար ցանկալի փաստաթուղթը։

Սակայն դա, նրա գնահատմամբ, չի ապահովագրի Հայաստանին ապագա պատերազմներից, ավելին՝ Բաքուն ցանկանում է ստորագրել այնպիսի փաստաթուղթ, որը օրինական հիմքեր կստեղծի ապագա պատերազմների համար։

«Ադրբեջանը ձեռ չի քաշի Հայաստանից։ Եթե ինչ-որ մեկը կարծում է, որ կհաջողվի նստել ու խուսափել ապագա պատերազմներից, ապա նա սխալվում է։ Խաղաղությունը հնարավոր է միայն այն դեպքում, եթե Բաքուն հասկանա, որ ագրեսիայի դեպքում լուրջ հակահարված կստանա»,- նշեց Կիվիրյանը։

Նրա գնահատմամբ, գլոբալ առումով փորձեր են արվում տարածաշրջանում ստեղծել այնպիսի իրավիճակ, որ հետագայում լուծեն Ռուսաստանի և Իրանի հարցերը։

«Այս դեպքում կամ Թեհրանը և Մոսկվան ստիպված կլինեն զինված հակամարտության մեջ մտնել, կամ լքել Հարավային Կովկասի տարածաշրջանը։ Նպատակն է Ադրբեջանի միջոցով ներքաշել Ռուսաստանին և Իրանին զինված հակամարտության մեջ և Թեհրանին ներքաշել լայնածավալ հակաիրանական առճակատման մեջ։ Մասնավորապես, նրանք փորձում են անտանելի պայմաններ ստեղծել Իրանի համար և մղել ակտիվ ռազմական գործողությունների, իսկ Ռուսաստանի համար՝ բացել երկրորդ ճակատը»,- հավելեց փորձագետը։

News.am