Արթուր ՂՈՋԱԲԱՂՅԱՆ․ ԱՐԴԵՆ 2-3 ՏԱՐԻ Է՝ ԻՆՉ ՀՈՂԱԿՏՈՐՆԵՐ ԵՆ ՊՈԿՈՒՄ ՍՅՈՒՆԻՔԻ ՄԱՐԶԻՑ
Սյունիքի մարզոսւմ ընդհանուր առմամբ արոտավայրերի խնդիրներ կան, միայն Տեղ գյուղում չէ, որ խնդիր կա: Այս մասին News.am-ի հետ զրույցում ասաց Գորիսի անվտանգության խորհրդի համակարգող Արթուր Ղոջաբաղյանը՝ անդրադառնալով ադրբեջանական ներխուժումներից հետո մարզում ստեղծված իրավիճակին:
«Հողը կոնկրետ դեֆիցիտ է մեր մարզում, միայն Տեղ գյուղի հատվածը չի, Սև լճի հատվածում էլ արոտավայրեր կային, ջուր կար, և փաստորեն այնտեղ հիմա ռազմական պոլիգոն է, ոչ մեկն էլ չի արածացնում, անասուններին այլևս այնտեղ չեն տանում, Սիսիանի հատվածում էլ կորուստներ ունենք: Գլոբալ առումով միայն Տեղ գյուղի խնդիրը չէ, ուղղակի Տեղ գյուղում մարդիկ իրենց մշակած հողակտորներն են կորցրել»,- ասաց նա:
Նրա խոսքով՝ իշխանության դիրքորոշումը, որ չարժե էսկալացիայի գնալ կամ պատերազմ անել մի քանի ձյունածածկ գագաթի համար, արդեն ինդիկատոր է նրանց որդեգրած քաղաքականության համար:
«Արդեն 2-3 տարի է, ինչ մի քանի ամիսը մեկ հողակտորներ են պոկում Սյունիքի մարզից, տարբեր տեղերից իրենք մաքսիմալ քերում են: Օրինակ՝ սկզբում Որոտան- Գորիս ճանապարհն էր, որ եթե մի 500 մետր ավելի կանգնեինք, այդ ճանապարհը մեզ կմնար, դրա համար ուղղակի կամք էր պետք, որ կանգնեին ասեին՝ քանի որ սահմանագծում չկա, քարտեզները հստակ չեն , այս ճանապարհը մերն ենք համարում, հետ չենք գնում, մինչև կորոշենք, բայց դա չարեցին, նույնիսկ կարող էին հիմնավորում բերեին, որ միջպետական ճանապարհ է, չենք կարող տալ, բայց նրանք ասացին, որ այլընտարանքային կկառուցեն: Նույն ձև Ճակատենում, այնտեղ ավելի քիչ ՝ մոտ 50- 100 մետր տարածք էր, որ կարող էին առաջ կանգնել, բայց թուրքերն եկան, կանգնեցին, ասեցին չենք թողնի, որ դուք օգտգործեք, հայկական կողմն էլ խելոք ասեց՝ հա, մենք այլընտրանքային ճանապարհ կսարքենք, չգիտեմ էլ սարքել են, թե չէ: Հետո էլ Սև լճի դեպքերը, եկան թուրքերը, կանգնեցին ասեցին՝ մի քանի ձյունածածկ գագաթի համար հո կռիվ չենք անելու, սակայն այդտեղ ահռելի տարածքներ են թուրքերը վերցրել, հետո Նորավանի դիրքերում առաջ եկան, հետո Իշխանասարի դիրքերը գրավեցին, անցան էս մի կողմը Իշխանասարի: Այսինքն սա պետական քաղաքակնություն է, երբ պետությունն իրեն վախկոտ երեխայի պես է պահում, պարտվողի հոգեբանությամբ մեր իշխանությունը չունի իր մոտեցումը, որ հողը պետք է պահեն, կամ դառնա դուխով տղա և ասի՝ «հոպ, մի վայրկյան, այսպես չի լինի», Արցախի հանձնելը ինդիկատոր էր նրանց հոգեբանությունը հասկանալու համար»,- ասաց նա:
Խոջաբաղյանի խոսքով՝ այս իշխանությունը հայրենիքի , հողի հետ կապված սկզբունք չունի:
«Որ ինքը ունենար դա, հստակ կերևար թե պատերազմի ժամանակ, թե դրանից հետո: Իսկ հիմա քարոզչությունն ու քաղաքականություն ցույց են տալիս, որ՝ էնքան որ յոլա ենք տանում էլի»,- ասաց նա:
Գորիսի անվտանգության խորհրդի համակարգողի խոսքով՝ Տեղ գյուղում անվտանգության լուրջ խնդիրներ կան, որը միայն այս առաջխաղացմամբ չէ, որ ստեղծվել են, այլ ընդհանրապես կա պատերազմի վտանգ:
«Երբ որ մենք հույսներս մեր վրա ենք դնում, ամեն ինչ էլ կարող ենք, բայց երբ ուրիշների վրա ենք դնում, անընդհատ էլ կորցնելու ենք: Մնում է հույսներս մեր վրա դնենք ու Արցախի հողերն էլ հետ բերենք: Իսկ այս իշխանությունը միայն թույլի դիրքերից է հանդես գալիս՝ բա մենք ինչ անենք, բա բայրաքթարները, բա դասալիքները, իսկ երբ նպատակ ես դնում ու պատրաստվում ես, հաստատ կհանսես քո նպատակին»,- իր խոսքը եզրափակեց Խոջաբաղյանը: