NYT․ ՌԴ-ն Հայաստանի և Ղազախստանի օգնությամբ շրջանցում է պատժամիջոցները
Ռուսաստանը, շրջանցելով պատժամիջոցները, երրորդ երկրների միջոցով ներկրում է պաշտպանական արդյունաբերության մեջ օգտագործվող արևմտյան էլեկտրոնային բաղադրիչներ, հայտնում է New York Times-ը։
Հրատարակության համաձայն՝ անցյալ ամսվա վերջին ԱՄՆ-ի և Եվրամիության պաշտոնյաները տեղեկություններ են փոխանակել միլիոնավոր դոլարներ արժեցող արգելված տեխնոլոգիաների մասին, որոնք հայտնվում են Ռուսաստանում՝ շրջանցելով պատժամիջոցները։
Հարկային և առևտրային մարմինների պաշտոնյաները նկատել են Հայաստանի, Ղազախստանի և այլ երկրների միջոցով դեպի Ռուսաստան միկրոսխեմաների և այլ էլեկտրոնային բաղադրիչների վաճառքի կտրուկ աճ։
Նրանց խոսքով՝ Ռուսաստանի Դաշնությունը կարողացել է ձեռք բերել միկրոսխեմաների և այլ էլեկտրոնային սարքերի հատկապես զգայուն կատեգորիաներ, որոնք, նրանց կարծիքով, շատ կարևոր են զենքի, այդ թվում՝ ռուսական թևավոր հրթիռների ստեղծման համար, որոնցով Ռուսաստանը հարձակվում է Ուկրաինայի վրա։
Ուկրաինա ներխուժելուց անմիջապես հետո ռուսական միկրոսխեմաների ներմուծումը կտրուկ անկումից հետո կրկին սկսել է աճել, հատկապես Չինաստանից։ Silverado Policy Accelerator վերլուծական կենտրոնի տվյալներով՝ հոկտեմբերից հունվար ժամանակահատվածում ամսական ներմուծումը կազմել է նախապատերազմյան ժամանակի միջին ցուցանիշի 50 տոկոսը և ավելին:
Հրատարակությունը նշում է, որ ամերիկյան և եվրոպական պաշտոնյաները գնալով ավելի են անհանգստանում, որ Ռուսաստանը ամերիկյան և եվրոպական ապրանքներ է ստանում Հայաստանի, Ղազախստանի և Կենտրոնական Ասիայի այլ երկրների միջոցով։
News.am