ՌՀՄ-ը հայտնել է Ռյազանում հայրենակիցների զանգվածային ձերբակալությունների մասին (ՏԵՍԱՆՅՈՒԹ)

Ռուսաստանի հայերի միությունը հայտնել է Ռյազանում հայրենակիցների զանգվածային ձերբակալությունների մասին, հաղորդում է rusarminfo-ն։

«Իսկապես, ինչ-որ հետապնդում է ընթանում. Աշխատանքից, սրճարաններից, ռեստորաններից բերման են ենթարկում, այդ թվում՝ կանանց, եթե նրանք ազգությամբ հայ են։ Բերում են բաժանմունք, այնտեղ ոչինչ չեն անում․․․Ձայնագրում են, մատնահետք վերցնում և բաց թողնում, բայց դա մասսայական է դարձել»,-հայտարարել է Ռուսաստանի հայերի միության փոխնախագահ Գերման Անանյանցը։

Նա պատմել է, որ իրեն հաջողվել է պարզել Ռյազանի իրավապահների գործողությունների դրդապատճառները՝ ընդգծելով, որ Ռյազանում իրավիճակն ունի իր նախապատմությունը և կոնկրետ նախաձեռնողներ՝ ի դեմս Ռյազանի շրջանի Ռուսաստանի ՆԳՆ քրեական հետախուզության վարչության պետ Ալեքսեյ Բիրյուկովի և փոխոստիկանապետ Դենիս Գրիբանովի:

Ռյազանի մարզի հայ համայնքի ղեկավարի տեղակալ Ռոբերտ Ալիխանյանը նշել է նման վայրագությունների պատճառները։

«Ինչպես բացատրել են համայնքի ղեկավարությանը, այս ամենը տեղի է ունենում այն պատճառով, որ երեք հայերի նկատմամբ քրեական գործ է հարուցվել։ Կենցաղային վեճի ժամանակ սրճարանում կռվել են Ուզբեկստանի քաղաքացիների հետ»,-նշել է Ալիխանյանը։

News.am