Վրաստանի ԱԳՆ․ Ռուսաստանի կողմից վիզաների չեղարկումը ողջունելի է

Ռուսաստանի կողմից Վրաստանի քաղաքացիների համար վիզային ռեժիմի վերացումը ողջունելի է հումանիտար տեսանկյունից: Այս մասին լրագրողներին ասել է Վրաստանի արտգործնախարար Իլյա Դարչիաշվիլին:

Ռուսաստանի նախագահ Վլադիմիր Պուտինի հրամանագրի համաձայն՝ Վրաստանի քաղաքացիների համար առանց վիզայի ռեժիմ կսահմանվի մայիսի 15-ից, ինչպես նաև կվերացվի դեպի Վրաստան ուղիղ ավիահաղորդակցության և տուրերի վաճառքի արգելքը:

«Ռուսաստանի Դաշնությունում ապրում է ավելի քան մեկ միլիոն մեր քաղաքացի, որոնք շատ սերտ կապ ունեն իրենց հարազատների հետ, որոնք ապրում են Վրաստանում: Հենց մարդասիրական առումով այդ որոշումը ողջունելի է»,-ասել է նա։

Նրա խոսքով՝ Ռուսաստանի կողմից վիզային ռեժիմի չեղարկումը կհեշտացնի Վրաստանի քաղաքացիների կենցաղային պայմանները։

«Դա նրանց ինքնիշխան որոշումն է։ Եվ ցանկացած երկիր որոշում է, թե որ երկրների քաղաքացիների համար վիզային ռեժիմ սահմանել, իսկ որ քաղաքացիների համար հանել։ Մենք գործ ունենք հենց այդ երևույթի հետ"»,-ասել է Դարչիաշվիլին։

Ռուսաստանը Վրաստանի քաղաքացիների համար վիզային ռեժիմ է սահմանել 2000 թվականին։ Վրաստանը միակողմանիորեն չեղարկել է վիզային ռեժիմը 2012 թվականի սկզբին։

Վրաստանի և Ռուսաստանի միջև ավիահաղորդակցությունը միակողմանի ընդհատվել էր Մոսկվայի կողմից 2019 թվականին։ Առիթը Թբիլիսիում տեղի ունեցած զանգվածային բողոքի ցույցերն էին՝ Վրաստանի խորհրդարանի շենքում ՌԴ Պետդումայի պատգամավոր Սերգեյ Գավրիլովի հայտնվելուց հետո:

News.am