«Հրապարակ». ԱՐԱՅԻԿ ՀԱՐՈՒԹՅՈՒՆՅԱՆԸ ՈՐՈՇԵԼ Է. ԱՐՑԱԽՈՒՄ ՀԱՆՐԱՔՎԵ ԿԱՆՑԿԱՑՎԻ
«Հրապարակ» թերթը գրում է. «Արցախում ներքաղաքական իրավիճակը սրվել է: Մի կողմից՝ ընդդիմադիր ուժերն են ակտիվացել` ի դեմս Սամվել Բաբայանի և Ռուբեն Վարդանյանի: Ընդ որում` Բաբայանը պահանջում է իրեն պետնախարար նշանակել: Մյուս կողմից, իշխանության ներսում` խորհրդարանում և կառավարությունում, հանգիստ չէ: Արցախի ԱԺ նախագահն էլ նախօրեին պահանջ է հնչեցրել` Արայիկ Հարությունյանը կա՛մ հրաժարական տա` գնա նոր ընտրությունների, կա՛մ վստահության հանրաքվե անցկացնի երկրում:
Հիշեցնենք, որ Արցախի նախագահը մի քանի օր առաջ հայտարարել էր քաղաքական կոնսուլտացիաներ սկսելու և նոր մարմին ձևավորելու մասին, որտեղ կընդգրկվեին ընդդիմադիր ուժերի ներկայացուցիչները, այդ թվում` Սամվել Բաբայանը և Ռուբեն Վարդանյանը: Սակայն կոնսուլտացիաները չեն ստացվում, քաղաքական ուժերը մի սեղանի շուրջ նստել չեն կարողանում, և որևէ համաձայնություն` գործող իշխանությունների, խորհրդարանական և արտախորհրդարանական ընդդիմության միջև չի կայանում:
Երեկ մենք տեղեկացանք, որ Արայիկ Հարությունյանը որոշում է կայացրել` կանգ առնելով վստահության հանրաքվե անելու առաջարկի վրա: Առաջիկա մեկ-երկու ամսվա ընթացքում հանրաքվեն կկազմակերպվի, և Արցախի ժողովուրդը կպատասխանի մեկ հարցի` վստահո՞ւմ է արդյոք Արցախի նախագահին, թե՞ ոչ: Եվ ներքաղաքական ճգնաժամը կհանգուցալուծվի` այս կողմ կամ այն կողմ»: