«ՔՊ» պատգամավոր․ Պայմանագիրը ստորագրվելուց առաջ պետք է անցնի ներպետական ընթացակարգեր
Մեկ վայրկյանում, մեկ օրվա մեջ, մեկ ժամում , մեկ բանակցության ընթացքում փաստաթղթի ստորագրում, վավերացում կամ ուժի մեջ մտնել չի կարող լինել։ Այսօր լրագրողների հետ ճեպազրույցում հայտարարեց «Քաղաքացիական պայմանագիր» խմբակցութան պատգամավոր Վլադիմիր Վարդանյանը։
Նա վստահեցրեց, որ «Խաղաղության պայմանագիրը» ստորագրվելուց առաջ պետք է անցնի բոլոր անհրաժեշտ ներպետական ընթացակարգերը։
«Նախ պետք է կառավարությունը հավանություն տա նման փաստաթղթի ստորագրմանը, հետո սահմանադրական դատարանը պետք է ստուգի դրանում ամրագրված պարտավորությունների համապատասխանեցումը սահմանադրությանը, հետո պետք է ներկայացվի ԱԺ վավերացմանը, այնուհետև պետք է ստորագրի հանրապետության նախագահը»,–ասաց նա, բայց հավելեց, որ սա միայն իր ենթադրությունն է, քանի որ այս ամենը սահմանադրական նորմի պահանջ է։
Նույն գործընթացը, ըստ նրա, պետք է անցնի նաև Ադրբեջանը։
Նշենք, որ ավելի վաղ միջազգային լրատվամիջոցները գրում էին, որ Ադրբեջանի նախագահ Իլհամ Ալիևն ու Հայաստանի վարչապետ Նիկոլ Փաշինյանը Լեռնային Ղարաբաղի վերաբերյալ խաղաղության համաձայնագիր հնարավոր է ստորագրեն հունիսի 1-ին Մոլդովայում կայանալիք Եվրոպական քաղաքական համայնքի գագաթնաժողովի ժամանակ։
Sputnik Արմենիա