«Ժողովուրդ». ՄԱՐԶԵՐՈՒՄ ՆՈՒՅՆՊԵՍ ՓԱՇԻՆՅԱՆԻ ԵՎ ՔՊ-Ի ՎԱՐԿԱՆԻՇԸ ԿՏՐՈՒԿ ԻՋԵԼ Է ՈՒ ՇԱՐՈՒՆԱԿՈՒՄ Է ՆՎԱԶԵԼ
«Ժողովուրդ» թերթը գրում է. «ՔՊ-ականներն այս օրերին լծվել են մարզերում իրենց վարկանիշի բարձրացման գործին: Նրանք մեծ ակտիվություն են ցուցաբերում մարզերում:
Օրինակ՝ կիրակի օրը Գևորգ Պապոյանը, Վաղարշակ Հակոբյանը, Նարեկ Գրիգորյանը և Ալխաս Ղազարյանը այցելել էին Գեղարքունիքի մարզ, հանդիպել տեղի բնակիչների հետ։ Հանդիպմանը մասնակցում էր նաև մարզպետ Կարեն Սարգսյանը: «Ժողովուրդ» օրաթերթին հաջողվեց պարզել՝ ինչն է մարզերում այս ակտիվության պատճառը:
Բանն այն է, որ Նիկոլ Փաշինյանն ու ՔՊ-ականներն անհանգստացած են Երևանում իրենց ցածր վարկանիշով, հիմա հրահանգ են ստացել գնալ մարզեր, շոշափել այնտեղի բնակիչների տրամադրությունները, հասկանալ՝ կողմ են արդյոք իրենց վարած քաղաքականությանը, ինչ են կարծում, այսպես կոչված, խաղաղության պայմանագրի մասին, ինչն իրենց համար դրոշակ են դարձրել իշխանությունները և ցանկացած զիջման ու սահմանային միջադեպի դեպքում առաջ են քաշում իրենց խոստացած խաղաղության օրակարգը, որն այդպես էլ չի գալիս:
Այսպիսով, ՔՊ-ականները ցանկանում են նաև մարզերի բնակիչներին ցույց տալ, որ իրենք մտահոգված են մարզերի խնդիրներով և ձեռնամուխ են դրանց շուտափույթ լուծմանը: Մեր տեղեկություններով, սակայն, արդյունքները, մեղմ ասած, այդքան էլ հուսադրող չեն. նրանց՝ մարզեր այցերն էլ փաստում են, որ վերջին շրջանում, ինչպես Երևանում, մարզերում նույնպես Նիկոլ Փաշինյանի և ՔՊ-ի վարկանիշը կտրուկ իջել է ու շարունակում է նվազել՝ բոլոր հարցումներով»։