ՄԵԾԱԳՈՒՅՆ ՎՏԱՆԳ Է ՄԵԶ ՀԱՄԱՐ. ԱՐՏԱԿ ԲԵԳԼԱՐՅԱՆԸ՝ ԱՂԴԱՄԻՑ ՀՈՒՄԱՆԻՏԱՐ ԲԵՌՆԵՐ ՏԵՂԱՓՈԽԵԼՈՒ ՄԱՍԻՆ
Խոշոր հաշվով սա մեծագույն վտանգ է մեզ համար. դա կլինի և հումանիտար, և քաղաքական, և անվտանգային առումներով. որևէ կերպով ընդունելի չէ, որ Ադրբեջանը փակելով Լաչինի միջանցքը, փորձում է մեզ հասցնել անտանելի վիճակի, որ մեզնից կորզի զիջումներ, այդ թվում Ադրբեջանի տարածքից Արցախ հումանիտար բեռների տեղափոխումով: Այս մասին NEWS.am-ի հետ զրույցում նշեց Արցախի նախագահի խորհրդական Արտակ Բեգլարյանը՝ անդրադառնալով նրան, որ Ադրբեջանն ռաջարկել է հումանիտար բեռներ Արցախ հասցնել Աղդամ-Ստեփանակերտ երթուղով:
«Այս ճնշման ձևն ինքնին միջազգային հանցագործություն է: Սակայն այս մասով եղավ Շառլ Միշելի հայտարարությունը, որը մեզ համար խիստ ցավալի, խիստ անընդունելի է, որ նա տրվում է ադրբեջանական նմանատիպ հանցավոր ծուղակների: Ամեն դեպքում պաշտոնական Ստեփանակերտը այս մասով լրացուցիչ հանդես կգա հայտարարությամբ»,-ասաց նա:
Արտակ Բեգլարյանը նկատեց, որ Լաչինի միջանցքը միակ միջազգայնորեն հաստատված ճանապարհն է, որ Արցախը կապում է Հայաստանին և ամբողջ աշխարհին. «Դա նաև հումանիտար միջանցք է, այլ ճանապարհ չի կարող փոխարինել այդ միջանցքին»: