Միայն այն գիտենք, որ հայրս Բաքվի հիվանդանոցում է. Վագիֆ Խաչատրյանի աղջիկը լուրեր է հերքում
Կարմիր խաչի ավտոմեքենայից ադրբեջանցիների կողմից առևանգված Վագիֆ Խաչատրյանի դուստրը` Վերա Խաչատրյանը, ՄԱԿ–ի երևանյան գրասենյակի դիմաց է և պահանջում է, որ ԿԽՄԿ–ն` որպես ամբողջ աշխարհում լծակներ ունեցող միջազգային կառույց, ինչ–որ տեղեկություն հայտնի իր հորից կամ ինչ–որ կերպ օգնինրան։
«Հիմա իմ ծնողներն ու հարզատները Արցախում են, ու իմ հույսը հիմա դուք եք` ՀՀ–ում ապրողները։ Խնդրում եմ` ինձ միայնակ մի թողեք, խնդրում եմ կանգնել իմ կողքին»,– ասաց նա։
Երեկ Կարմիր խաչից հայտնել էին, որ ԿԽՄԿ-ի ներկայացուցիչներն այցելել են Լաչինի միջանցքում ձերբակալված հիվանդին, նրան հնարավորություն է տրվել կապ հաստատել ընտանիքի հետ
Վերա Խաչատրյանը նշեց, որ իրեն կամ մյուս հարզատներին չի հաջողվել կապ հաստատել հոր հետ։
«Մենք միայն այն գիտենք, որ հայրս Բաքվում է, հիվանդանոցում է»,– նշեց նա։
Վագիֆ Խաչատրյանի դուստրը հերքեց նաև այն լուրերը, թե իր հայրը Արցախի պաշտպանության բանակի նախկին հրամանատար Սամվել Բաբայանի վարորդն է եղել։
«Այդ առումով տարածված լուսանկարները կեղծ են, սուտ են, դա իմ հայրը չէ»,– ընդգծեց Վերա Խաչատրյանը։
Նա նաև կոչով դիմեց Ադրբեջանի դատախազությանը, որպեսզի նախ ճշտեն իրենց կողմից հրապարակվող լուրերը, քանի որ դրանք ոչ մի աղերս չունեն իրականության հետ։
Sputnik Արմենիա