ԱՄՆ Պետդեպ. Թուրքիան կարող է «արդյունավետ» դեր խաղալ հայ-ադրբեջանական կարգավորման հարցում
Չեմ ուզում մանրամասն խոսել՝ սա մասնավոր դիվանագիտական զրույց է։ Կարող եմ միայն ասել, որ մենք իսկապես հավատում ենք, որ Թուրքիան կարող է արդյունավետ դեր խաղալ այս հարցում, ճեպազրույցում ասել է ԱՄՆ Պետդեպարտամենտի խոսնակ Մեթյու Միլլերը՝ պատասխանելով հարցին, թե ինչպես է սահմանում Թուրքիայի դերը Հայաստանի և Ադրբեջանի միջև հարաբերությունների կարգավորման գործընթացում։
ԱՄՆ Պետդեպարտամենտի ներկայացուցիչը նաև նշել է, որ «չի ցանկանում խոսել Ռուսաստանի մասին, երբ խոսքը վերաբերում է Հայաստանին ու Ադրբեջանին»։
«Ես ուզում եմ խոսել այն երկու երկրների մասին, որոնք անմիջականորեն կապված են, որոնք անմիջական կողմեր են այս վեճում։ Մենք ուղղակիորեն շփվել ենք այս երկրների հետ։ Հատուկ բանագնաց Բոնոն անցյալ շաբաթ այցելեց տարածաշրջան և անմիջականորեն շփվեց նրանց հետ: Եվ մենք հավատում ենք, չնայած երկրների ցանկացած մեկնաբանության, որոնք այս հարցում կողմեր չեն, որ համաձայնությունը մնում է հասանելի, և մենք կշարունակենք աշխատել նրանց հետ դրան հասնելու համար», - ասել է Միլլերը:
News.am