Առաջիկա 1-2 տարում «Գեոպրոմայնինգը» պատրաստվում է Ագարակի կոմբինատում 15 մլն դոլար ներդնել
Առաջիկա 1-2 տարում «Գեոպրոմայնինգ» ընկերությունների խումբը պատրաստվում է Ագարակի պղնձամոլիբդենային կոմբինատում մոտ 15 մլն դոլար ներդնել: Այս մասին ՀՀ վարչապետ Նիկոլ Փաշինյանին ասել է կոմբինատի գործադիր տնօրեն Ալեքսանդր Բելյաևը վարչապետի՝ ձեռնարկություն կատարած այցի ընթացքում:
Բնապահպանական իրավիճակի և ջրառի ծավալների մասին վարչապետի հարցին (մանրացված հանքաքարի մշակման համար-խմբ.) Բելյաևը պատասխանել է, որ ջրի հաշվառման համակարգը դեռևս թվայնացված չէ, բայց դրա ծախսի մոնիթորինգն իրականացվում է ամեն օր, այդ նպատակով վերցնում են հոսքաչափիչների տվյալները:
«Կարելի է նաև թվային համակարգ տեղադրել, չեմ կարծում, որ դա շատ մեծ ծախսեր է պահանջում»,-հայտարարել է Փաշինյանը:
Ներդրումային ծրագրում ձգտումների տեղ կա, պատասխանել է Բելյաևը։ Նա հավելել է, որ վերջին 5 տարվա ընթացքում պղնձամոլիբդենային հանքավայրում և հարստացնող ֆաբրիկայում 25 մլն դոլար է ներդրվել, իսկ այս և հաջորդ տարի կներդրվի ևս 15 մլն դոլար:
«Գեոպրոմայնինգ» ընկերությունների խմբի փոխնախագահ Անդրեյ Կիշկինսկին, որ ներկա էր հանդիպմանը, հավելել է, որ կոմբինատը շարունակում է արդյունահանումը սահմանված ծավալներով:
Հիշեցնենք, որ ռուսական «Գեոպրոմայնինգ» ընկերությունների խումբը Հայաստանի հանքարդյունաբերության ոլորտի խոշորագույն ներդրողն է․ նրա ակտիվները հանրապետությունում, բացի Ագարակի կոմբինատից, ներառում են նաև Սոթքի ոսկու հանքավայրը, Արարատ քաղաքի ոսկու կորզման ֆաբրիկան, ինչպես նաև Քաջարանի պղնձամոլիբդենային հանքավայրը և Զանգեզուրի պղնձամոլիբդենային կոմբինատը (Հայաստանի խոշորագույն արդյունաբերական ձեռնարկությունը): Զանգեզուրի կոմբինատում ընկերությունը ոչ միակ, բայց խոշորագույն բաժնետերն է (բաժնետոմսերի մինորիտար փաթեթ ունի նաև կառավարությունը):
Sputnik Արմենիա