Ֆարսը շարունակվում է. Ադրբեջանում սկսվել է Վագիֆ Խաչատրյանի բողոքի քննարկումը

Ադրբեջանում շարունակվում է Վագիֆ Խաչատրյանի գործով դատական ֆարսը։

Ինչպես տեղեկացրել են ադրբեջանական ԶԼՄ-ները, սկսվել է բողոքարկման քննարկումը։

Հիշեցնենք, որ Վ.Խաչատրյանը Արցախյան առաջին պատերազմի մասնակից է, նրան առևանգել են այս տարվա ամռանը Լաչինի միջանցքը հատելիս, ընդ որում՝ առևանգել են տառացիորեն ԿԽՄԿ-ի ձեռքերից։ Մարտական գործողություններին մասնակցության համար Ադրբեջանի իշխանությունները Խաչատրյանին ներկայացրել են առանձնակի ծանր հանցագործությունների կատարման մեղադրանքներ։

Չնայած Ադրբեջանի իշխանությունների ակնհայտ անօրինական գործողություններին, այդ թվում մարդու առևանգմանը, որը գտնվել է ԿԽՄԿ-ի պաշտպանության ներքո, Խաչատրյանը ոչ միայն ազատ չի արձակվել, այլև հայտնվել է մեղադրյալների աթոռին։ Հապճեպ սարքված գործով անցնում են 59 «տուժողներ», նրանք բոլորը «ճանաչել» են Խաչատրյանին և պատմել նրա կատարած «հանցագործությունների» մասին։ Վագիֆ Խաչատրյանը իրեն մեղավոր չի ճանաչել ներկայացված մեղադրանքներով և հայտարարել է, որ ոչ մի հանցագործության չի մասնակցել։

News.am