Փնտրում ենք նրանց, ովքեր կգան և կապացուցեն, որ դա ՀՀ տարածք է. Սիմոնյանը` 4 գյուղի մասին
ՀՀ Ազգային ժողովի նախագահ Ալեն Սիմոնյանը չի կարող երաշխավորել, որ Ադրբեջանը դուրս կգա ՀՀ–ում իր օկուպացրած տարածքներից, նաև չի բացառում, որ Ադրբեջանը կհարձակվի, եթե չստանա իր պահանջած 4 գյուղերը։ Այս մասին նա ասաց այսօր լրագրողների հետ ճեպազրույցի ժամանակ։
Անդրադառնալով Ադրբեջանի պահանջած տարածքներին՝ Ալեն Սիմոնյանը կրկնեց վարչապետ Նիկոլ Փաշինյանի ու մյուս ՔՊ-ականների պնդումը՝ դրանք ՀՀ տարածք չեն։
«Փնտրում ենք հիմա մարդկանց, ովքեր կգան ու կապացուցեն, որ դրանք Հայաստանի տարածք են»,- ասաց Սիմոնյանը՝ հավելելով, որ Հայաստանի Հանրապետությունն իր տարածքը մետր առ մետր կարող է ցույց տալ բոլոր թվականների քարտեզներով։
«Երբ սեպտեմբերի 21-ին բոլորով դուրս ենք գալիս փողոց և նշում Անկախության օրը, մենք նշում ենք ինչ-որ կոնկրետ բան, չէ՞։ Հռետորական հարց է։ Կոնկրետ սահմանի տեղը ՀՀ-ն գիտի, Տավուշի բնակիչները գիտեն, որ այս գծից այն կողմ միշտ եղել է Ադրբեջան, և ՀՀ բոլոր իշխանությունները միշտ էլ իմացել են, մենք էլ Վրաստան գնալիս միշտ տեսել ենք այդ ճանապարհը, նույնիսկ ինչ-որ ժամանակ կանգնում և ցույց էինք տալիս, որ սա արդեն Ադրբեջանն է»,- նշեց Սիմոնյանը։
Ըստ նրա՝ այստեղ ոչ մի նոր բան չկա, միայն թե ընդդիմությունը «հերթական ֆալստարտն է անում». փորձում է դրա վրա ինչ-որ բան գեներացնել, բայց ըստ խորհրդարանի նախագահի՝ չի ստացվելու, որովհետև ՀՀ որևէ տարածք սակարկման նույնիսկ չի ենթարկվում։ Ասում է՝ երկու տարի էր` միջանցքի մասին էր խոսվում, զիջման չգնացինք, որովհետև ակնհայտ էր, որ դա մեր իրավասության գոտում է։
«Հիմա տեղի է ունենում գործընթաց, որի անունն է ՀՀ-ի և Ադրբեջանի միջև սահմանի գծում։ Ոչ թե գծում, այլ վերականգնում նրա, ինչ կա, եղել է և իրավաբանական փաստաթղթավորմամբ ապացուցված է։ Խոսքը այնպիսի քարտեզի մասին է, որ ստորագրված է թե՛ Հայաստանի, թե՛ Ադրբեջանի կողմից»,- ասաց Սիմոնյանը։
Նրա կարծիքով՝ սահմանազատման գործընթացը հենց Տավուշից սկսելը ճիշտ է, որովհետև այնտեղ վիճելի մասերն ավելի քիչ են։
«Տավուշի մարզով սկսելը մեզ համար ընդունելի է, շատ տեղեր պարզ են, այնտեղ մեծ հաշվով շատ մեծ վեճ չկա։ Մնացած մասերում վեճ կա»,- հավելեց նա։
Պաշտոնական Երևանի ցանկությունն է ունենալ սահման․ բոլոր այն հատվածներում, որտեղ Ադրբեջանն առաջ է, պետք է հետ քաշվի, դա պետք է տեղի ունենա ամբողջ սահմանի երկայնքով։ Նույնը պետք է անի Հայաստանը։
Sputnik Արմենիա
