Եվրոպացի ագարակատերերը բողոքի ցույց են անցկացրել Բրյուսելում (ՏԵՍԱՆՅՈՒԹ)
Հարյուրավոր տրակտորներ անցել են Բրյուսելի փողոցներով՝ նման կերպ բողոքելով ԵՄ բնապահպանական քաղաքականության դեմ, հայտնել է Reuters-ը։ Ոստիկանությունը հաշվել է մոտ 500 տրակտոր, ինչը ավելի քիչ էր, քան այս տարի Բրյուսելում անցկացված ագարակատերերի նախորդ բողոքի ցույցերի ժամանակ։
«Մենք եկել ենք Լեհաստանից, քանի որ գիտենք՝ մեր խնդիրների աղբյուրը Բրյուսելն է։ Որովհետև ուզում հիմնովին փոխել Կանաչ գործարքը: Մենք հավաքվել ենք այստեղ բոլոր եվրոպացի ագարակատերերի հետ՝ կարևոր ուղերձ հղելու մեր եվրոպացի, բելգիացի քաղաքական գործիչներին, որպեսզի նրանք ավելի արդյունավետ օրենքներ ընդունեն՝ ի շահ գյուղատնտեսության, ինչպես նաև Եվրոպայի բոլոր մարդկանց», - հայտարարել են ակցիայի մասնակիցները։
Հունիսի 6-9-ը Եվրախորհրդարանի ընտրություններից օրեր առաջ Նիդեռլանդներից, Բելգիայից, Լեհաստանից և Գերմանիայից ագարակատերերը մեկնել են Բրյուսել՝ բողոքելու համար ԵՄ բնապահպանական քաղաքականության դեմ, որը կազմակերպիչների կարծիքով խաթարում է եվրոպացի ագարակատերերի մրցունակությունը:
Եվրոպայում ագարակատերերն ամիսներ շարունակ դատապարտում են սննդի ցածր գները, չափից դուրս կանոնակարգումը և ազատ առևտրի համաձայնագրերը, որոնք, ըստ նրանց, դժվարացնում են իրենց համար մրցակցել էժան ներմուծման հետ: Բողոքի ակցիան կազմակերպել է հոլանդական Farmers Defense Force լոբբիստական խումբը և աջակցել աջակողմյան և ծայրահեղ աջ խմբերին:
News.am