«ԺՈՂՈՎՈՒՐԴ»-Ը ՏԵՂԵԿԱՑԵԼ Է ՓԱՇԻՆՅԱՆԻ՝ 2026 ԹՎԱԿԱՆԻ «ԱՆԿԱՆԽԱՏԵՍԵԼԻ» ԸՆՏՐՈՒԹՅՈՒՆՆԵՐԻՆ ՆԱԽԱՊԱՏՐԱՍՏՎԵԼՈՒ ՄԱՍԻՆ
Վարչապետ Նիկոլ Փաշինյանը կուսակիցների հետ ակտիվորեն քննարկում է 2026 թվականի խորհրդարանական ընտրությունների նախապատրաստական աշխատանքները, գրում է «Ժողովուրդ»-ը՝ հղում անելով իշխանություններին մոտ կանգնած աղբյուրներին։
Ըստ թերթի՝ Փաշինյանը «Քաղաքացիական պայմանագրի» անդամներին հասկացրել է, որ ընդդիմությունը պատրաստվում է ընտրությունների, և դրանք կարող են լինել «թեժ ու անկանխատեսելի»։
«ՔՊ-ում կարծում են, որ փողոցային պայքարն ավարտված է, ընդդիմությունն այլևս փողոց դուրս չի գա, ու իրենք պետք է ամեն ջանք թափեն 2026 թվականի ընտրություններում վերարտադրվելու համար: Իշխանականներն ամեն շաբաթ մարզեր կգնան, Փաշինյանն առանձին կշրջի, ու ամառը կօգտագործեն քարոզչամեքենան աշխատեցնելու ուղղությամբ»,- գրում է թերթը։
Հունիսի 27-ին «Հրապարակ»-ը տեղեկացրել էր, որ «Քաղաքացիական պայմանագրի» ղեկավարությունը կուսակցության պատգամավորներին հանձնարարել է ամռանը մեկնել հանրապետության մարզեր՝ բնակիչներին հանդիպելու և նրանց խնդրանքները կատարելու նպատակով, որպեսզի 2026 թվականի ընտրություններին կուսակցության վարկանիշը բարձրանա։
Մայիսին անցկացված MPG/Gallup International Association-ի հարցման համաձայն՝ ՀՀ քաղաքացիների միայն 27,8%-ն էր հավանություն տվել վարչապետ Նիկոլ Փաշինյանի աշխատանքին։