ՀԱՐՑՈՒՄ ԱԴՐԲԵՋԱՆՈՒՄ. ՀԱՐՑՎՈՂՆԵՐԻ 83,8 ՏՈԿՈՍԸ ԿՈՂՄ Է ՀԱՅԱՍՏԱՆԻ ՀԵՏ ԽԱՂԱՂՈՒԹՅԱՆ ՀԱՄԱՁԱՅՆԱԳՐԻ ՍՏՈՐԱԳՐՄԱՆԸ
Սոցիալական հետազոտությունների ադրբեջանական կենտրոնը հարցումներ է անցկացրել բնակչության շրջանում՝ պարզելու համար հանրային կարծիքը Ադրբեջանի և Հայաստանի միջև խաղաղության համաձայնագրի ստորագրման հեռանկարների հարցում։
Ինչպես տեղեկացրել են ադրբեջանական ԶԼՄ-ները, հարցման արդյունքներով, որն իրականացվել է 2024թ. հունիսին, «Պաշտպանո՞ւմ եք արդյոք խաղաղության պայմանագրի ստորագրումը Ադրբեջանի և Հայաստանի միջև» հարցին հարցվողների 83,8 տոկոսը պատասխանել է՝ «այո, աջակցում եմ», 13,5 տոկոսը պատասխանել է «ոչ, չեմ պաշտպանում», 2,7 տոկոսը դժվարացել է հայտնել իր կարծիքը։
Հարցումներն իրականացվել են 18 և բարձր տարիքի 1 152 հարցվողների շրջանում։ Հարցումներն իրականացվել են անանունության սկզբունքով։ Հաշվի առնելով հարցվողների թիվը՝ վրիպանքը կազմում է 3 տոկոս 95 տոկոս վստահության միջակայքում։
