Գեղարքունիքում և Կոտայքում կներդրվի ԵՄ չափանիշներին հմապատասխան աղբահանության համակարգ

Կառավարությունն իր այսօրվա՝ հուլիսի 25-ի նիստում որոշեց ՏԿԵ նախարարությանը «Կոտայքի և Գեղարքունիքի ԿԿԹԿ» ՍՊԸ-ին փոխանցումներ կատարելու թույլտվություն տալ:

«Կոտայքի և Գեղարքունիքի մարզերի կոշտ թափոնների կառավարման» ծրագրի շրջանակներում նախատեսվում է ՀՀ Կոտայքի և Գեղարքունիքի մարզերի բոլոր բնակավայրերում ներդնել եվրոպական չափանիշներին համապատասխան աղբահանության համակարգ, կիրառել ԵՄ չափանիշներին համապատասխան մեքենասարքավորումներ և կառուցել բնապահպանական, քաղաքաշինական և սանիտարական նորմերին համապատասխան հանրապետությունում առաջին սանիտարական աղբավայրը։

Ծրագրի ընդհանուր բյուջեն 11,0 մլն եվրո է, որից 5,5 մլն եվրոն հանիսանում է վարկային միջոց, 5,5 մլն. եվրոն` դրամաշնորհ:

Ծրագրի շրջանակներում՝

- ավարտվել են Հրազդան համայնքում նոր սանիտարական աղբավայրի և Մարտունի ու Ակունք բնակավայրերում աղբի փոխաբեռնման կայանների կառուցապատման աշխատանքները։

- երկու մարզերի բոլոր բնակավայրերում ԵՄ չափանիշներին համապատասխան մշակվել են աղբահանության սխեմաները, որոնց հիման վրա մշակվել է աղբավայրը և փոխաբեռնման կայանները շահագործող հատուկ տեխնիկայի, աղբատար մեքենաների ու աղբամանների գնման մրցութային փաթեթները և հայտարարվել են համապատասխան մրցույթները։

Կայացած մրցույթների արդյունքներով՝

- «Տեգետա մոթորս» ընկերության հետ կնքվել է պայմանագիր՝ թվով 28 աղբատար մեքենաների ձեռքբերման համար, որոնց մատակարարումն ակնկալվում է 2024-ի հունիս- օգոստոսին /պայմանագրային արժեք՝ 4,385 մլն եվրո/։

- «Elkoplast CZ» ընկերության հետ 2024 թվականի մայիս ամսին կնքվել է պայմանագիր թվով 6100 պլաստիկ, 300 մետաղական 1100լ և 300 հատ 240լ աղբամանների ձեռքբերման համար, որոնց մատակարարումն ակնկալվում է 2024-ի սեպտեմբեր- հոկտեմբերին /պայմանագրային արժեք՝ 1,051 մլն եվրո/։

-«Tegeta Construction Equipment» LLC-ի հետ 2024 թվականի հունվար ամսին կնքվել են պայմանագրեր՝ բուլդոզերի /204տ, 4խմ/ և ամբարձիչի /12,6տ, 2,5խմ/ ձեռքբերման համար /պայմանագրային արժեք՝ 512,4 հազ եվրո/, որոնց մատակարարումը նախատեսվում է 2024 թվականի հուլիս-օգոստոս ամիսներին։

-«Tegeta Commercial Vehicles» LLC -ի հետ 2024 թվականին կնքվել են պայմանագրեր  ինքնաթափ բեռնատարի /40տ/ և կեղտաջրերի հավաքման բեռնատարի /10խմ/ ձեռքբերման համար /պայմանագրային արժեք՝ 298,7 հազ եվրո/, որոնց մատակարարումն ակնկալվում է 2024 թվականի հուլիս-օգոստոս ամիսներին։

ՀՀ 2024 թվականի պետական բյուջեում նախատեսված է ՀՀ պետական բյուջեից համաֆինանսավորում 1,279,603,400 դրամ: Իսկ ծրագրի շրջանակներում նախատեսվող մեքենասարքավորումների արժեքը կազմում է շուրջ 7,0 մլն եվրոին համարժեք դրամ /վարկային և դրամաշնորհային միջոցներ/։

Դրանքը, ըստ նախնական հաշվարկների շուրջ 495 հազար եվրո է կամ շուրջ 210 մլն մլն դրամ:

News.am