ԿԱՐԵՆ ԱԴՈՆՑԸ ԶԳՈՒՇԱՑՐԵԼ Է ՀԱՅԱՍՏԱՆԻ ՏՆՏԵՍՈՒԹՅԱՆ ՎՏԱՆԳԱՎՈՐ ՄԻՏՈՒՄՆԵՐԻ ՄԱՍԻՆ
Հայաստանի կառավարությունն իր տնտեսական քաղաքականությունը կառուցում է կայուն ազգային արժույթի վրա։ Դրա մասին News.am-ի թղթակցի հետ զրույցում հայտարարել է տնտեսական գիտությունների դոկտոր Կարեն Ադոնցը։
Նրա գնահատմամբ՝ դա հնարավորություն տվեց նվազեցնելու ՀՆԱ/պարտք հարաբերակցությունը 50%-ից ցածր, ինչը թույլ է տալիս նոր պարտք վերցնել և գումարներ ներդնել տնտեսության այնպիսի ոլորտներում, մասնավորապես՝ շինարարությունը, առևտուրը, սպառողական վարկերը՝ դրանով իսկ պահպանելով տնտեսական ակտիվությունը։
«Սակայն կարևոր է հաշվի առնել, որ դոլարի հնարավոր կտրուկ արժևորումը կհանգեցնի պետական պարտքի կտրուկ աճի, և պետությունը չի կարողանա նոր միջոցներ ներգրավել։ Որոշ ժամանակ անց դա տեղի կունենա, քանի որ տնտեսությունը հիփոթեքային և սպառողական վարկերի հիման վրա չի կարող զարգանալ։ Սա զարգացում չէ, այլ բուրգ։ Ի վերջո, ամեն ինչ կանգ կառնի, և մենք կտեսնենք բազմաթիվ կառույցներ, որոնք ոչինչ չեն արտադրում: Շինարարության ոլորտում աշխատում են բազմաթիվ աշխատակիցներ, որոնք տնտեսության մեջ շրջանառվող և ակտիվություն ապահովող աշխատավարձ են ստանում»,- ընդգծել է Ադոնցը։
Նա հավելել է, որ եթե շինարարության ոլորտում ճգնաժամ սկսի, և սպառողական տնտեսության շարժը կանգ առնի, կսկսվի տնտեսական անկումը, և մարդիկ կզրկվեն աշխատանքից։
«Մենք արդեն հատել ենք կարմիր գիծը, որից հետո իրավիճակն այլևս հնարավոր չի լինի շտկել։
Եթե նույնիսկ կառավարությունը որոշի անցնել պահանջարկի վրա հիմնված տնտեսական համակարգից դեպի առաջարկի վրա հիմնված համակարգի, իրավիճակն արդեն անհնար կլինի շտկել, քանի որ այս բուրգի համակարգի ցանկացած փոփոխություն լուրջ խնդիրների կհանգեցնի»,- նշել է փորձագետը։
Նա կառավարությանը կոչ արեց սկսել աշխատել առաջարկի վրա հիմնված տնտեսական համակարգի մշակման ուղղությամբ։
«Հենց սա պետք է փոխարինի համակարգին, որն անխուսափելիորեն հանգեցնելու է ճգնաժամի։ Առանց դրա մենք կհայտնվենք էլ ավելի բարդ իրավիճակում։ Այսօր կառուցվող շենքերը ոչինչ չեն արտադրում և ոչ մի ճգնաժամի չեն դիմանա»,- եզրափակել է տնտեսագետը։