Սարգիս Կարապետյան․ ՀՀ տնտեսությունը ավելի քան 20 հազար պոտենցիալ նոր աշխատատեղ է կորցրել (ՏԵՍԱՆՅՈՒԹ)

Մեկ նոր բարձր տեխնոլոգիական աշխատատեղը ստեղծում է 3-6 նոր աշխատատեղ այլ ոլորտներում: Դրա մասին NEWS.am-ի թղթակցի հետ զրույցում հայտարարել է Հայաստանի առաջադեմ տեխնոլոգիաների ձեռնարկությունների միության գործադիր տնօրեն Սարգիս Կարապետյանը։

Նա նշել է, որ տեղեկատվական տեխնոլոգիաների տեսակարար կշիռը ՀՆԱ-ում մոտավորապես 14 տոկոս է, և եթե այդ տոկոսն ավելանա, ընդհանուր առմամբ տնտեսության արդյունավետությունը նույնպես կբարձրանա։

«Վերջին տարիներին զբոսաշրջության ոլորտը և այլ ոլորտները հենց դրա շնորհիվ են սկսել զարգանալ»,- նշել է Կարապետյանը։

Նրա հաշվարկներով՝ 2017-2020 թվականներին ոլորտում բացվել է մոտավորապես 14 հազար աշխատատեղ, որից 5400-ը մնացել է թափուր։

«Սա նշանակում է, որ մեր տնտեսությունը կորցրել է 5400 բարձր վարձատրվող աշխատող։ Իսկ դա իր հերթին նշանակում է, որ ևս 15000 պոտենցիալ նոր աշխատատեղեր այլ ոլորտներում չեն ստեղծվել»,- ընդգծել է նա։ Նրա համոզմամբ՝ երկրում լավ մասնագետներ կան, բայց նրանց թվաքանակը քիչ է։ Ինչպես ամբողջ աշխարհում, Հայաստանում ևս պահանջարկը գերազանցում է առաջարկին։