ԶԼՄ-ների էթիկայի դիտորդ մարմին․ «Առաջին ալիքը» խախտել է լրագրողական էթիկայի նորմերը

Հանրային հեռուստաընկերությունը խախտել է լրագրողական էթիկայի նորմերը։ Այս մասին եզրակացություն է հրապարակել ԶԼՄ-ների էթիկայի դիտորդ մարմինը։

Բան այն է, որ «Արցախ միություն» ՀԿ նախագահ Արտակ Բեգլարյանի բողոք է ներկայացրել ԶԼՄ-ների էթիկայի դիտորդ մարմնին և խնդրել ուսումնասիրել «Առաջին ալիքի» լուրերի մայիսի 24-ի և հունիսի 6-ի թողարկումներում հեռարձակված երկու ռեպորտաժները, որոնք պատմում էին ընդդիմադիր հավաքներին մասնակցության համար գումար բաժանելու դեպքով հարուցված քրեական վարույթների մասին։ Ըստ Բեգլարյանի՝ ռեպորտաժներում անհարկի շեշտադրվել է ենթադրյալ հանցագործների արցախյան ծագումը և կատարվել է ընդհանրացում՝ դրանով բացասական վերաբերմունք հրահրելով արցախցիների հանդեպ այն անձանց շրջանում, որոնք բացասաբար են վերաբերվում ընդդիմադիր շարժմանը:

Դիտորդ մարմնին տված պարզաբանման մեջ Հանրային հեռուստաընկերության գործադիր տնօրեն Հովհաննես Մովսիսյանը նշել է, որ նշված ռեպորտաժներում Հանրայինը նույնությամբ հեռարձակել է Քննչական կոմիտեից ստացված պաշտոնական հաղորդագրությունները։

«Քննելով դիմումը՝ դիտորդ մարմինը վճռել է, որ թեև Հանրայինը հեռարձակել է ՔԿ պաշտոնական հաղորդագրությունը, այդուհանդերձ, դա նրան չի ազատում լրագրողական էթիկայի նորմերին հետևելու պարտավորությունից։ Ուստի, հեռարձակելով վերոնշյալ բովանդակությունը, հեռուստատեսությունը խախտել է իր ստորագրած էթիկայի կանոնագրի մի շարք կետեր»,–նշված է հաղորդագրության մեջ։

Մասնավորապես, խախտվել է մասնավոր կյանքի անձեռնմխելիությանը հետևելու պահանջը (հանցանքի մեջ մեղադրվող անձանց ձայնը հեռարձակվել է առանց փոփոխելու), արցախյան ծագմամբ անձանց հանդեպ բացասական կարծրատիպեր են տարածվել՝ ավելի խոցելի վիճակի մեջ դնելով նրանց։ Հեռուստատեսությունը չի հեռացրել ռեպորտաժի ֆեյսբուքյան հրապարակման ներքո ատելության խոսք, բռնություն և օրենքով արգելված այլ գործողություններ քարոզող, ակնհայտ վիրավորանք պարունակող բազմաթիվ մեկնաբանությունները։ Խախտվել է նաև կանոնագրի այն կետը, որը սահմանում է, որ նյութին ուղեկցող լուսանկարները համապատասխանեն իրականությանը։

Դիտորդ մարմինը հույս է հայտնել, որ արցախցիների կամ ցանկացած այլ խմբի հանդեպ կանխակալ վերաբերմունք արտահայտող նման սայթաքումներ հետագայում տեղ չեն գտնի Հանրային հեռուստատեսության եթերում:

Ընդգծվում է, որ Հանրային հեռուստաընկերությունը պետք է դիտորդ մարմնի եզրակացության՝ խախտմանը վերաբերող հատվածներն առանց մեկնաբանությունների հրապարակի իր կայքում։

Sputnik Արմենիա