Ադրբեջանը պահանջում է պատժամիջոցներ կիրառել Հայաստանի դեմ՝ ՌԴ սանկցիաները շրջանցելու հարցում օգնելու համար
Ադրբեջանի ոչ կառավարական կազմակերպությունները բաց նամակ են հղել ԱՄՆ-ի և ԵՄ-ի հիմնական պատասխանատու կառույցների ղեկավարներին՝ Ռուսաստանի դեմ պատժամիջոցների ներդրման և իրականացման մոնիտորինգի համար։ Այս մասին հայտնում է APA-ն։
Նամակում, որն ուղղված է Ֆինանսների քարտուղարության ղեկավար Ջանեթ Լ. Յելենին, որին ենթարկվում է ԱՄՆ արտաքին ակտիվների վերահսկողության գրասենյակը, ԱՄՆ առևտրի նախարարության արդյունաբերության և անվտանգության բյուրոյի ղեկավար Ալան Ֆ. Էստավեսին, ԱՄՆ արդարադատության նախարար Մերրիկ Բ. Գիրլյանդին, Եվրահանձնաժողովի նախագահ Ուրսուլա ֆոն դեր Լայենին, ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելին և Եվրամիության Խորհրդի նախագահ Շառլ Միշելին, հայտնել են, որ Ադրբեջանի ոչ կառավարական կազմակերպությունները խնդրում են «լուրջ մտահոգություն հայտնել Հայաստանի Հանրապետության գործունեության վերաբերյալ, որը պայմաններ է ստեղծել ուկրաինական պատերազմի կապակցությամբ Ռուսաստանի դեմ սահմանված միջազգային պատժամիջոցներից խուսափելու համար»։
«Արևմտյան երկրների կողմից սահմանված այս պատժամիջոցներն ուղղված են Ռուսաստանին պատասխանատվության ենթարկելուն և հումանիտար ճգնաժամը կանխելուն։ Հայաստանի իշխանությունները, վարելով երկերեսանի քաղաքականություն, խախտում են միջազգային իրավունքի պահանջները և, աջակցելով Ռուսաստանին պատժամիջոցներից խուսափելու հարցում, խորացնում են հումանիտար ճգնաժամը Ուկրաինայում»,- ասված է նամակում։
Որպես իրենց պահանջի «հիմք»՝ ադրբեջանական հասարակական կազմակերպությունները նշում են «Հայաստանի ներմուծման և արտահանման կտրուկ աճը, որն ունի ամենափոքր արտաքին առևտրաշրջանառությունը, որը չի համապատասխանում իր տնտեսական ներուժին»։
Նամակի հեղինակները պահանջում են ավելի մեծ վերահսկողություն Հայաստանի առևտրային գործողությունների և պատժամիջոցների կիրառման, ինչպես նաև Հայաստանի վրա դիվանագիտական ճնշումների ավելացման համար։ Նշվում է, որ Հայաստանի շարունակական աջակցությունը Ռուսաստանին խաթարում է Ուկրաինայում խաղաղության և կայունության վերականգնմանն ուղղված համաշխարհային ջանքերը և խրախուսում միջազգային իրավունքի խախտումները։ «Մենք շտապ դիմում ենք ձեզ՝ դադարեցրեք Հայաստանին թույլ տալ պայմաններ ստեղծել, որպեսզի Ռուսաստանը խուսափի պատժամիջոցներից»,- ընդգծվում է նամակում։
Նկատենք, որ Ադրբեջանում, որին ռուս բարձրաստիճան պաշտոնյաները բազմիցս անխոհեմաբար անվանել են «ռազմավարական գործընկեր», այս նամակի նման ազատություններն իրականացվում են բացառապես իշխանությունների օրհնությամբ։
News.am