ՀՅԴ․ Լեռնային Ղարաբաղի իշխանությունները պետք է տեղեկացնեն անցած տարի կատարվածի մանրամասների մասին

Լեռնային Ղարաբաղի իշխանությունները և բազմաթիվ արցախահայեր, որոնք գիտեն անցած տարվա կատարվածի մասին, պետք է հայտնեն, թե ինչ է տեղի ունեցել։ Այս մասին լրագրողների հետ զրույցում սեպտեմբերի 19-ին ասել է «Հայաստան» խմբակցության պատգամավոր, ՀՅԴ Գերագույն մարմնի ներկայացուցիչ Իշխան Սաղաթելյանը։ Նրա խոսքով՝ լռությունը հանգեցնում է այն բանին, որ շարունակվում է ստի տարածումը։

Նա ավելացրել է, որ արցախահայերը պայքարել են մինչև վերջ, և դա թույլ է տվել 100 000 մարդու ողջ դուրս գալ այնտեղից։

Սաղաթելյանը վստահություն է հայտնել, որ Հայաստանի վարչապետ Նիկոլ Փաշինյանը, Լեռնային Ղարաբաղն Ադրբեջանի մաս ճանաչելով, փորձել է լեգիտիմացնել Ադրբեջանի նախագահ Ալիևի հանցավոր գործողությունները։ «Հայաստանի իշխանությունները շարունակում են լեգիտիմացնել Ալիևի ցեղասպանածին գործողությունները Լեռնային Ղարաբաղում։ Բացի այդ, նրանք անում են ամեն ինչ, որպեսզի հայերի վերադարձի հարցը Լեռնային Ղարաբաղ և ղարաբաղյան հարցը ընդհանուր առմամբ վերջնականապես փակվի»,- նշել է պատգամավորը։

Նա Հայաստանի իշխանություններն անվանել է Լեռնային Ղարաբաղի էթնիկ զտման համամասնակիցներ՝ պահանջելով նրանց հրաժարականը։ «Նրանք նույնիսկ ցավակցության խոսքերով հանդես չեն գալիս, չեն այցելել «Եռաբլուր», մինչդեռ ակնթարթորեն արձագանքում են որևէ վթարի մի ինչ-որ հեռավոր երկրում»,- նշել է ընդդիմադիր գործիչը։

Նրա համոզմամբ՝ իշխանություններն սկսել են նոր սրբապղծության փուլը։ «Երեկ նա (նկատի ունի Փաշինյանին- խմբ.), հայտարարելով, որ ողբերգության պատճառը հայրենասիրության ներկայիս մոդելն է, վիրավորել է նահատակներին, որոնք իրենց կյանքն են տվել հայրենիքին։ Ընդ որում, առանց անվտանգության անհնար է հասնել սոցիալական բարեկեցության, իսկ ներկայիս գործընթացը ստրկություն տանող ճանապարհ է։ Իշխանությունների նպատակն էլ հենց դա է»,- ընդգծել է Իշխան Սաղաթելյանը՝ նշելով ավելի լայն զանգվածներին ներկա իշխանությունների դեմ պայքարում ընդգրկելու անհրաժեշտության մասին։ Խորհրդարանական ընդդիմության ներկայացուցիչը միաժամանակ ընդունել է, որ ներքաղաքական պայքարի շրջանակում առայժմ «չի հաջողվում գտնել կառավարող ուժի տեղեկատվական ահաբեկչության հակաթույնը»։

News.am