Շաթիրյան․ ՍԴ որոշումն այսօր, ամենայն հավանականությամբ, չի հրապարակվի

Այսօր, ամենայն հավանականությամբ, Հայաստանի և Ադրբեջանի միջև սահմանազատման հանձնաժողովների կանոնակարգի սահմանադրականության հարցով գործով ՍԴ որոշումը չի հրապարակվի: Այս մասին NEWS.am-ին հայտնեց ՍԴ դատավոր Էդգար Շաթիրյանը:

Հիշեցնենք, որ Սահմանադրական դատարանում ավարտվել է Հայաստանի և Ադրբեջանի միջև սահմանազատման հանձնաժողովների կանոնակարգի սահմանադրականության հարցով գործի քննությունը։ Դատարանը գնացել է խորհրդակցական սենյակ՝ որոշում կայացնելու։

ՍԴ-ի դրական որոշման դեպքում փաստաթուղթը Կառավարությունը կուղարկի Ազգային ժողով՝ վավերացման:

Նշենք, որ դատարանը գրավոր ընթացքով քննարկումը սկսել էր այսօր ժամը 11–ին։

Կանոնակարգի օրենքի նախագիծը կառավարությունը չզեկուցվող հարցերի փաթեթով հաստատել է սեպտեմբերի 5-ին:

Մինչև Ազգային ժողովում կմեկնարկի նախագծի վավերացման ընթացակարգը, այն ուղարկվել է Սահմանադրական դատարան:

Հիշեցնենք՝ ըստ երկու երկրի սահմանազատման հանձնաժողովների` ապրիլի 19-ի 8-րդ հանդիպման արձանագրության, հանձնաժողովներն ավարտել են համատեղ գործունեության կանոնակարգի համաձայնեցման աշխատանքը: Կանոնակարգը ստորագրվել է օգոստոսի 30-ին և Հայաստանն ու Ադրբեջանը սկսել են ներպետական ընթացակարգերը: