ՔԱՆԻ՞ ՔՊ-ԱԿԱՆ Է ՄԻԱՑԵԼ ԳՐԻԳՈՐ ՄԻՆԱՍՅԱՆԻ ՊԱՇՏՈՆԱՆԿՈՒԹՅԱՆ ՍՏՈՐԱԳՐԱՀԱՎԱՔԻՆ
ՀՀ արդարադատության նախարար Գրիգոր Մինասյանի պաշտոնանկության համար ԱԺ «Քաղաքացիական պայմանագիր» խմբակցությունում սեպտեմբերի 26–ի դրությամբ դեռ 30 ստորագրություն է միայն հավաքվել: Այս մասին գրում է «Ժողովուրդը»։
«Կարելի է հետևություն անել, որ կա՛մ ՔՊ-ում նախարարի պաշտոնանկությունը ոչ միանշանակ է ընդունվել, կա՛մ էլ ՔՊ-ականներին հետ է պահում այն, որ այս նախաձեռնության «ղեկավարը» Արփի Դավոյանն է՝ Անդրանիկ Քոչարյանի հանձնարարությամբ»,–գրում է «ժողովուրդը»:
Նշենք, որ Գրիգոր Մինասյանի հեռացման հարցը պետք է նախ քննարկվի ՔՊ խմբակցության նիստի ընթացքում, ապա խմբակցության ղեկավար Հայկ Կոնջորյանը կուսակիցների ստորագրությունները պետք է ներկայացնի ՀՀ վարչապետ Նիկոլ Փաշինյանին:
«Ի դեպ, ՔՊ-ից «Ժողովուրդ» օրաթերթին փոխանցեցին նաև, որ քիչ ստորագրությունների պատճառ կարող են լինել պատգամավորների գործուղումները, քանի որ այս օրերին իշխանականների մեծ մասը բացակայել է երկրից, մի մասն էլ խուսափում է ստորագրել, քանի որ կարծում են՝ գուցե այնքան էլ Փաշինյանի սրտով չէ այս նախաձեռնությունը»,–գրում է պարբերականը:
Հիշեցնենք` ՔՊ– ական պատգամավոր Հովիկ Աղազարյանը 2 օր առաջ հաստատեց, որ «Քաղաքացիական պայմանագիր» խմբակցության որոշ պատգամավորներ ստորագրահավաք են սկսել արդարադատության նախարար Գրիգոր Մինասյանին պաշտոնանկ անելու դիմումը ՀՀ վարչապետ Նիկոլ Փաշինյանին ներկայացնելու համար։
Նշենք, որ նախարարին պաշտոնանկ անելու դիմումը Փաշինյանին ներկայացնելու համար բավարար է 24 ստորագրությունը։