«ՀայաՔվեն» կոչ է անում պատգամավորներին` չվավերցնել սահմանազատման վերաբերյալ ՍԴ որոշումը

«ՀայաՔվեն» կոչ է անում ՀՀ ԱԺ պատգամավորներին` չվավերցնել սահմանազատման վերաբերյալ Սահմանադրական դատարանի` սեպտեմբերի 26–ի որոշումը։ Այդ մասին նախաձեռնությունը հայտարարություն է հրապարակել «Ֆեյսբուքի» իր էջում։

Ավելի վաղ հայտնել էինք, որ ՀՀ Սահմանադրական դատարանը սեպտեմբերի 26–ին որոշեց, որ Հայաստանի և Ադրբեջանի միջև սահմանազատման պետական հանձնաժողովի կանոնակարգը համապատասխանում է ՀՀ Սահմանադրությանը։

«Կոչ ենք անում Ազգային Ժողովի բոլոր այն պատգամավորներին, ովքեր իրենց իրապես կաշկանդված չեն համարում հրամայական մանդատով, առաջնորդվում են սեփական խղճով և Հայաստանի Հանրապետության ազգային–պետական շահերով, չվավերացնել ներկայացված կանոնակարգը, իսկ ԱԺ իշխող մեծամասնության կողմից վավերացման պարագայում դիտարկել մանդատները վայր դնելու հնարավորությունը և դրանով ձախողել Հայաստանի Հանրապետության կապիտուլյացիայի հետագա գործընթացը»,– ասված է հայտարարության մեջ։

Ըստ «ՀայաՔվեի»՝ մոլորեցնող է ՍԴ դիրքորոշումը, ըստ որի իբրև թե ՀՀ և Արցախի վերամիավորումը չի կարող մեկնաբանվել որպես ՀՀ Անկախության հռչակագրում ձևակերպված նպատակ, և այդպիսով չի կարող ընկալվել որպես Հայաստանի Հանրապետության սահմանադրական պարտավորություն։

«ՍԴ դիրքորոշումը, որն ընկած է սույն որոշման հիմքում, կառուցված է մոլորեցնող, ակնհայտ քաղաքական ենթատեքստ ունեցող փաստարկների վրա, որոնցում ընտրողական ու սուբյեկտիվ մեկնաբանություններ են տրվել ՀՀ Սահմանադրության, ՀՀ Անկախության հռչակագրի և 1989 թ․ դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի համատեղ որոշման դրույթների, այդ դրույթների միջև իրավական կապերի ու ազդեցությունների վերաբերյալ»,– ընդգծում են նախաձեռնությունից։

«ՀայաՔվեից» նշում են, որ այսպիսով Սահմանադրական դատարանը գործող վարչախմբի պատվերով երկրում սահմանադրական հեղաշրջման մասնակիցն է դառնում, իսկ ընդունված որոշումը ՀՀ–ում սահմանադրական կարգի տապալման, պետական իշխանության բոլոր ճյուղերի յուրացման հերթական վկայությունն է։

Նախաձեռնությունից պատահական չեն համարում, որ ՍԴ որոշումն ընդունելուն մասնակցել են այն դատավորները, որոնց ընտրությունը տեղի է ունեցել 2020 թ․ ԱԺ որոշման հիման վրա։

«ՀայաՔվեից» նաև հայտարարել են, որ ՍԴ այն դատավորները, ովքեր իրենց որոշմամբ մաս են կազմել գործող վարչախմբի գործողություններին, իրենց դրանով դուրս են դրել օրենքի և օրինականության սահմաններից և անխուսափելիորեն պատասխանատվության են ենթարկվելու սահմանադրական կարգի փաստացի տապալման փորձի համար:

Նշենք, որ ՀՀ Սահմանադրական դատարանն իր որոշմամբ վճռել է, որ Հայաստանի Անկախության մասին հռչակագրում հաստատագրված համազգային այն նպատակները, որոնք Սահմանադրության բուն տեքստում տեղ չեն գտել, չունեն իրավական ուժ։ ՍԴ-ն, ըստ էության, հայտարարում է, որ Անկախության մասին հռչակագրում հաստատագրված համազգային նպատակները 1995թ․ հուլիսի 13-ից սկսած որևէ նշանակություն, իրավական ուժ չունեն։

հավելենք, որ Սահմանադրական դատարանի դատավորներից 3-ը նաև հատուկ կարծիք են ներկայացրել, որոնցից Վահե Գրիգորյանը, Դավիթ Խաչատուրյանը` դրական, մեկը` Հրայր Թովմասյանինը` բացասական։

Sputnik Արմենիա