ՌԴ ԱԳՆ-ն մեկնաբանել է Փաշինյանի հայտարարությունը Ադրբեջանի հետ տրանսպորտային կապն ապաշրջափակելու վերաբերյալ

Մենք ելնում ենք այն պայմանավորվածություններից, որոնք ձեռք են բերվել ամենաբարձր մակարդակով եռակողմ ձևաչափի շրջանակում։ Դրա մասին այսօր՝ հոկտեմբերի 16-ին, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով Հայաստանի և Ադրբեջանի միջև տրանսպորտային կապի ապաշրջափակման վերաբերյալ լրագրողի հարցին։

«Ինչպե՞ս է Ռուսաստանը գնահատում Հայաստանի վարչապետ Նիկոլ Փաշինյանի հայտարարությունը եռակողմ հայտարարության 9-րդ կետը մեկնաբանելու՝ որպես Ադրբեջանի արևմտյան շրջանների և նախիջևանի միջև տրանսպորտային հաղորդակցությունների մոնիտորինգի գործառույթը Ռուսաստանի ԱԴԾ-ին տրամադրելու հնարավորություն, բայց ոչ այս հաղորդակցության վերահսկում»,- հարցրել է լրագրողը։

ՌԴ ԱԳՆ պաշտոնական ներկայացուցիչը նշել է, որ մեծ աշխատանք է տարվել ղեկավարների որոշմամբ ստեղծված եռակողմ խմբում, որը համանախագահում են Ռուսաստանի, Ադրբեջանի և Հայաստանի փոխվարչապետերը, ապաշրջափակման հիմնական պարամետրերի շուրջ համաձայնեցվել է երկաթուղային հաղորդակցությունը՝ ներառյալ Հայաստանի Սյունիքի մարզով Ադրբեջանի հիմնական տարածքի և Նախիջևանի Ինքնավար Հանրապետության միջև տարանցումը։

«Եվ խնդրի շահերից ելնելով, մնացած հարցերն ու տարաբնույթ մեկնաբանությունները նպատակահարմար է համակարգել նույն ձևաչափով, որտեղ դրանք քննարկվել են։ Հետևաբար մենք դրան այլընտրանք չենք տեսնում և կշարունակենք աշխատել այս ուղղությամբ»,- հավելել է նա։

News.am