Բաքվի դատարանը մերժել է Ռուբեն Վարդանյանի բողոքը

Բաքվի դատարանը մերժել է Արցախի նախկին պետնախարար, բարերար, գործարար Ռուբեն Վարդանյանի բողոքը, որը վերաբերում էր նրա կալանքի ժամկետի երկարաձգմանը։ Այս մասին հայտնում են ադրբեջանական լրատվամիջոցները։

Բաքվում ապօրինի պահվող Լեռնային Ղարաբաղի նախկին պետնախարարը խնդրել էր չեղարկել իր կալանքի որոշումը, սակայն դատարանն անհիմն է համարել բողոքը։

Նշենք, որ հոկտեմբերի 18-ին Ռուբեն Վարդանյանի կալանքի ժամկետը երկարաձգվել էր։ Վարդանյանը կալանքի տակ է պահվում արդեն ավելի քան 1 տարի։ Նրա կալանքը 5 ամսով երկարաձգվել էր մայիսին։

Նրա փաստաբանները հոկտեմբերի 3-ին հայտնել էին, որ դատական հայցեր են ներկայացրել Բաքվի դատարան՝ պնդելով, որ Վարդանյանը կտտանքների է ենթարկվել և զրկվել է դատավարության արագ իրականացման իրավունքից:

Հիշեցնենք` ադրբեջանցի սահմանապահները 2023 թվականի սեպտեմբերի վերջին ձերբակալեցին Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին։

Ադրբեջանական լրատվամիջոցները հոկտեմբերի 11-ին հայտնեցին, որ երկարաձգվել է Արայիկ Հարությունյանի, Արկադի Ղուկասյանի, Բակո Սահակյանի, Դավիթ Բաբայանի, Դավիթ Իշխանյանի, Դավիթ Մանուկյանի և մյուսների կալանքի ժամկետը։

Sputnik Արմենիա