Ադրբեջանն օգտագործել է գերեվարված հայ պատանդներին որպես սակարկության առարկա, ապա դրժել խոստումը

Իր դեմքով Ադրբեջանը ծիծաղելի ընտրություն է ՄԱԿ-ի կլիմայական COP29 գագաթնաժողովն անցկացնելու համար․ գրել է Ամերիկյան ձեռնարկատիրության ինստիտուտի (American Enterprise Institute) ավագ վերլուծաբան Մայքլ Ռուբինը National Security Journal-ի համար։

Ըստ նրա՝ Ադրբեջանը չի կարող իրեն ներկայացնել որպես կլիմայական իրավիճակի պոտենցիալ զոհ. նրա գլխավոր բնապահպանական մտահոգությունը ոչ թե կլիման, այլ՝ սեփական աղտոտվածությունն է և իշխող Ալիևների ընտանիքի հետ կապ ունեցողների՝ օրենքից վեր կանգնելու կարողությունը:

Համաժողովը նախկինում հյուրընկալողներից շատերը կոռուպցիոն խնդիրներ ունեն, բայց ոչ Ադրբեջանի մակարդակի։ Ադրբեջանում ոչ միայն ազատությունն անկում է ապրում, այլև այն աշխարհի ամենակոռումպացված պետություններից է, իսկ Ալիևի երկու դուստրերը վերահսկում են ավելի քան 13 միլիարդ դոլար արժողությամբ բիզնես կայսրություն:

COP29-ը հյուրընկալելու համար Ադրբեջանն օգտագործել է գերեվարված հայ պատանդներին որպես սակարկության միջոց՝ պնդելով, որ կազատի նրանց միայն այն դեպքում, երբ Հայաստանը հրաժարվի միջոցառումն ընդունելու իր հայտից:

Պետքարտուղարությունը, որը մտահոգված է Հայաստանի և Ադրբեջանի միջև խաղաղության հաստատմամբ, Հայաստանի վարչապետ Նիկոլ Փաշինյանին հորդորել է ենթարկվել: Վերջինս հետ է կանչել հայտը, սակայն Ադրբեջանը շարունակել է պահել հայ գերիներին և զավթել ավելի քան 200 քառակուսի կիլոմետր տարածք, որը միջազգային հանրությունը ճանաչում է որպես Հայաստանի մաս: Անցյալ տարի Արցախի հազարամյա բնիկ հայ համայնքի էթնիկ զտումներից հետո Ադրբեջանը համակարգված կերպով սկսել է ոչնչացնել հայկական ժառանգությունը ողջ տարածաշրջանում: Ինչն ավելի վատ է, Բաքուն օտարերկրյա բարձրաստիճան պաշտոնյաներին, այդ թվում՝ Վաշինգտոնի վերլուծական կենտրոններից և Բաքվում ԱՄՆ դեսպանին, տանում է շրջագայությունների հնագույն բնակավայրերի տեղում գտնվող Դիսնեյլենդի նման ախտահանված իր տարբերակները: Նման շրջագայությունները կշատանան, քանի որ Բաքուն ձգտում է նորմալացնել էթնիկ զտումները: Եթե Սպիտակ տունը օրհնի Ադրբեջանին COP29-ն այսօր ընդունելու համար, դա նման կլինի, օրինակ, Սադամ Հուսեյնի Իրաքին միջազգային ֆորում անցկացնելու թույլտվություն տալուն։

Բայդենն էլ ավելի մեծ սխալ է գործում՝ Ջոն Պոդեստային նշանակելով ամերիկյան պատվիրակության ղեկավար։ Պոդեստան փոխարինել է Ջոն Քերիին Բայդենի կլիմայական հարցերով բանագնացի պաշտոնում, սակայն նրա ռեզյումեի որոշ հատվածներ կասկածներ են առաջացնում: Նա հայտնի է դարձել որպես Բիլ Քլինթոնի աշխատակազմի ղեկավար: Այն բանից հետո, երբ Քլինթոնը լքել է պաշտոնը, նա իր եղբոր՝ Թոնիի հետ համահիմնել է Podesta Associates, Inc.-ը (այժմ՝ Podesta Group), որը BP-ին համարում է իր առաջատար հաճախորդների թվում: BP-ն, թերևս, Ադրբեջանի գլխավոր արևմտյան գործընկերն է և, ըստ երևույթին, լոբբինգ է անում Միացյալ Թագավորության, եթե ոչ արևմտյան այլ կառավարությունների շրջանում՝ անտեսելու նախագահ Իլհամ Ալիևի ավելի ու ավելի անկանոն պահվածքը:

Հեղինակը կոչ է արել ԱՄՆ ղեկավարությանը բոյկոտել Բաքվում COP29-ը և ազդանշան տալ, որ նրանք չեն կարող օգտագործել շրջակա միջավայրը և խավիարային դիվանագիտությունը՝ խուսափելու իրենց պատմությունից և գործողություններից:

ABC MEDIA