Վերաօծումից հետո առաջին անգամ Մայր տաճարում եպիսկոպոսական ձեռնադրություն տեղի կունենա
Մայր տաճարի վերաօծումից հետո առաջին անգամ տեղի կունենա եպիսկոպոսական ձեռնադրություն եւ օծում: Տեղեկությունը հայտնում է Մայր աթոռի տեղեկատվական համակարգը։
Նշվում է, որ արարողությունը տեղի կունենա վաղը` նոյեմբերի 3-ին, սրբազան պատարագի արարողության ընթացքում:
«Այս տարի եպիսկոպոսության աստիճան կշնորհվի Արգենտինայի և Չիլիի հայոց թեմի առաջնորդ Տ. Առեն վարդապետ Շահենյանին, Ֆրանսիայի հայոց թեմի առաջնորդ Տ. Գրիգոր վարդապետ Խաչատրյանին, Արթիկի թեմի առաջնորդ Տ. Նարեկ վարդապետ Ավագյանին, Սյունյաց թեմի առաջնորդ Տ. Մակար վարդապետ Հակոբյանին, Գեղարքունյաց թեմի առաջնորդ Տ. Պարթև վարդապետ Բարսեղյանին և Հունաստանի հայոց թեմի առաջնորդ Տ. Խորեն վարդապետ Առաքելյանին»,- նշվում է հաղորդագրությունում:
Հիշեցնենք, որ Մայր տաճարի վերաօծման պատմական արարողությունը տեղի ունեցավ այս տարվա սեպտեմբերին: Մինչ այդ Մայր տաճարը օծվել էր 303 թվականին` կառուցվելուց հետո։ Վերաօծում կատարվեց, քանի որ տաճարը հիմնանորոգվել է։