Իրական վտանգ կա՞ Բալայանի հասցեին Ադրբեջանի դեսպանի սպառնալիքից. պարզաբանում է ԱՀԾ–ն
ՀՀ արտաքին հետախուզության ծառայությունը (ԱՀԾ) Sputnik Արմենիայի գրավոր հարցմանն ի պատասխան մեկնաբանել է` արդյոք ԵՄ–ում ՀՀ դեսպան Տիգրան Բալայանին իրական վտանգ սպառնում է Ադրբեջանի ներկայացուցչի սպառնալիքներից հետո։
Նշենք, որ նոյեմբերի սկզբին հայտնի դարձավ, որ Բելգիայում Ադրբեջանի դեսպան Վագիֆ Սադիգովը սպառնացել է սպանել Բելգիայում ՀՀ արտակարգ և լիազոր դեսպան, ԵՄ–ում Հայաստանի ներկայացուցչության ղեկավար Տիգրան Բալայանին։ Դեպքը տեղի է ունեցել Թուրքիայի դեսպանատան կազմակերպած ընդունելության ժամանակ։ Նոյեմբերի 5-ին ՀՀ ԱԳ փոխնախարար Պարույր Հովհաննիսյանը հաստատել էր, որ Բալայանի հասցեին սպառնալիքներ և վիրավորանքներ են եղել։
ԱԳ մյուս փոխնախարար Վահան Կոստանյանն էլ ընդգծել էր, որ Բալայանի մասնակցությունը Թուրքիայի ազգանին տոնին նվիրված ընդունելությանը համաձայնեցված է եղել ՀՀ ԱԳՆ–ի հետ։
«Ծառայությունն իր լիազորությունների շրջանակում մասնակցում է Հայաստանի Հանրապետության պաշտոնատար անձանց, այդ թվում դիվանագետների նկատմամբ անվտանգության ռիսկերի գնահատման և ըստ արդյունքների` անհրաժեշտ միջոցների ձեռնարկմանը միտված տարբեր իրավասու մարմինների աշխատանքներին»,– նշվում է ԱՀԾ ղեկավար Քրիստիննե Գրիգորյանի պատասխանում։
Sputnik Արմենիան արտաքին հետախուզության ծառայության պետից նաև հետաքրքրվել է Իսրայելից և Իսրայելի միջոցով Ադրբեջանին զենք մատակարարելու մասին տվյալների ունենալու մասին։ Գրիգորյանը հայտնել է, որ ծառայությունն իր լիազորություններն իրականացնելիս առաջնորդվում է իր առջև դրված առաջնահերթ խնդիրների կատարմամբ։ Նա նաև ընդգծել է, որ հետախուզական տվյալները պատշաճ կարգով ներկայացվում են ՀՀ վարչապետին։
Մենք նաև հետաքրքրվել ենք արդյոք արտաքին հետախուզության ծառայությունում արդեն ամբողջությամբ ավարտվել է ձևավորման փուլը և անցումը անմիջական պարտականություններին։ Այս հարցին ի պատասխան Գրիգորյանը նշել է, որ ծառայությունը գործում է և լիազորությունների կատարումը սկսել է 2023 թվականի հոկտեմբերի 4-ին։
Միաժամանակ, ծառայությունն իր ձևավորման համար նախատեսված պահանջներն իրականացնում է «Արտաքին հետախուզական գործունեության և արտաքին հետախուզության ծառայության մասին» օրենքի անցումային դրույթների շրջանակներում։
Հիշեցնենք, որ միջադեպի մասին հայտնել էր Politico-ն։ Ըստ հրապարակման՝ Հայաստանի դեսպանությունը պաշտոնական բողոք է ուղարկել Բրյուսելի այլ դիվանագիտական ներկայացուցչություններին այն բանից հետո, երբ դեսպանն ասել է, որ սպանության սպառնալիքներ է ստացել իր ադրբեջանցի գործընկերոջից։ Նամակում ասվում է, որ Հայաստանի դեսպան Տիգրան Բալայանը ենթարկվել է «բանավոր հարձակումների և ահաբեկման» Ադրբեջանի դեսպան Վագիֆ Սադիկովի կողմից, ով «ուղղակի սպառնալիքներ է հայտնել նրա կյանքին»։
ՀՀ փոխարտգործնախարարն ավելի ուշ ասել էր, որ Բելգիայի իշխանություններին ու ԵՄ ղեկավարությանը տեղեկացրել են Հայաստանի դեսպանին ուղղված սպառնալիքների մասին:
Ինքը՝ դեսպան Բալայանը, հրաժարվել է հայկական լրատվամիջոցներին մեկնաբանություն տալ։ NEWS.am-ի խնդրանքին ի պատասխան՝ դիվանագետը չոր խորհուրդ էր տվել դիմել ԱԳՆ մամուլի ծառայությանը։
Լուրեր Հայաստանից - NEWS.am