ՍԱ ԶԻՋՈՒՄ ՈՒ ՆՎԵՐ Է ԱԴՐԲԵՋԱՆԻՆ․ Տիգրան ԱԲՐԱՀԱՄՅԱՆԸ՝ ՔՊ-ի չքվեարկելու մասին
Իշխանությունն ուներ քաղաքական որոշում` դեմ քվեարկել Ադրբեջանում պահվող հայ ռազմագերիների վերաբերյալ հայտարարությանը, ու այդ որոշումն արտահայտեց պարզապես չքվեարկելով։ Այսօր Ազգային ժողովում լրագրողների հետ ճեպազրույցում ասաց «Պատիվ ունեմ» խմբակցության քարտուղար Տիգրան Աբրահամյանը։
Ավելի վաղ հայտնել էինք, որ ընդդիմադիր «Հայաստան» և «Պատիվ ունեմ» խմբակցությունների պատգամավորների նախաձեռնությամբ ԱԺ–ում այսօր քննարկվեց Բաքվում պահվող հայ ռազմագերիների հարցը, ընդդիմադիրներն առաջարկում էին նաև հայտարարություն ընդունել, բայց «Քաղաքացիական պայմանագիր» խմբակցությունը չմասնակցեց քվեարկությանը և տապալեց այն։
«Սա զիջում է, նվեր է Ադրբեջանին, և նաև Ադրբեջանի համար սա հնարավորություն է արտաքին աշխարհում, տարբեր կառույցներում, տարբեր դերակատարների հետ հանդիպումներում ի ցույց դնելու Հայաստանի իշխանությունների այս մոտեցումը»,- ասաց Աբրահամյանը։
Նրա խոսքով՝ հայ ռազմագերիների վերադարձի թեման երբևէ իշխանության համար առաջնային օրակարգ չի հռչակվել, թեպետ տարբեր հանդիպումների ժամանակ որոշակիորեն հարցը քննարկվել է։
Հիշեցնենք` Բաքուն պաշտոնապես հաստատում է 23 հայի գերեվարման փաստը, որոնցից 17-ն այնտեղ են հայտնվել Լեռնային Ղարաբաղի դեմ Ադրբեջանի սեպտեմբերյան ագրեսիայից հետո: Նրանց թվում են Արցախի ռազմաքաղաքական ղեկավարության ներկայացուցիչները։